ბრაზილიის 2014 წლის მუნდიალის E ჯგუფის შეხვედრაში, ეკვადორთან დაძაბულ ორთაბრძოლაში, გამარჯვება მოიპოვა შვეიცარიის ნაკრებმა. ამ შეხვედრას საკმაოდ დიდი მნიშვნელობა ჰქონდა, ვინაიდან სწორედ ეს გუნდები მოიაზრებიან ჯგუფში მეორე ადგილის დაკავების მთავარ კანდიდატებად. ფავორიტებად შვეიცარიელები მიიჩნეოდნენ, თუმცა პირველი ტაიმი სამხრეთამერიკელთა გამარჯვებით დასრულდა.

22-ე წუთზე, საჯარიმოდან ჩაკიდებული ბურთი, უმეთვალყურეოდ დატოვებულმა ენერ ვალენსიამ, თავური დარტყმით გადაგზავნა ევროპელთა კარში. მეორე ტაიმის დასაწყისში ჰიტცფელდმა მოედანზე ადმირ მეჰმედი შემოუშვა, რომელმაც ზუსტად 2 წუთში, ანგარიში გაათანაბრა. „ფრაიბურგის“ 23 წლის ფორვარდმა, რიკარდო როდრიგესის მიერ კუთხურიდან ჩამოწოდებულ ბურთს ზუსტი თავური დარტყმით უპასუხა - 1:1. 75-ე წუთზე შვეიცარიელთა თავკაცმა მორიგი ცვლილება გამოიცნო და მოედანზე სეფეროვიჩი გამოიყვანა. ამ უკანასკნელმა, არბიტრის მიერ დამატებულ მესამე წუთზე, რიკარდო როდრიგესის მორიგი გადაცემა გოლად აქცია და საკუთარ გუნდს ნანატრი 3 ქულა მოუტანა.

ეს შეხვედრა ძალიან ახლოს იყო ფრესთან, ახლა კი, მუნდიალის ზედიზედ მეთერთმეტე შეხვედრა დასრულდა გამარჯვებულის გამოვლენით.

შვეიცარია  2:1  ეკვადორი

შვეიცარია: ბენალიო, ლიხტშტაინერი, ჯურუ, ფონ ბერგენი, როდრიგესი, ბეჰრამი, ინლერი, შაქირი, ქსაკა, შტოკერი (მეჰმედი 46’), დრმიჩი (სეფეროვიჩი 75’).

ეკვადორი: დომინგესი, პარედესი, გუაგუა, ერასო, აიოვი, ა.ვალენსია, გრუესო, ნობოა, მონტერო (როხასი 77’), ე.ვალენსია, კაისედო (აროიო 70’).

გოლები: ე.ვალენსია (22’), მეჰმედი (48’), სეფეროვიჩი (90+3’)

გაფრთხილებები: ჯურუ (84’), პარედესი (53’).

მსაჯი: რავშან ირმატოვი (უზბეკეთი).