საბელია გვპირდებოდა, რომ არგენტინის ნაკრები, ისტორიაში პირველად, პრაგმატულ და შედეგზე ორიენტირებულ ფეხბურთს ითამაშებდა. ეს ყოველივე ცოტა დაუჯერებლად მეჩვენებოდა, მაგრამ ფაქტი სახეზეა, სამხრეთამერიკელები მოედანზე ვერ ბრწყინავენ, მაგრამ სასურველ შედეგს უკვე მეორე თამაშია აღწევენ.

ჯერ იყო და არგენტინის ნაკრებმა ბოსნიას ძლივს მოუგო (2:1), ახლა კი ჯგუფის ყველაზე სუსტ მეტოქეს, ირანს მხოლოდ და მხოლოდ არბიტრის მიერ დამატებულ დროში გაუტანა გოლი. შეხვედრა სტადიონ „მინეირაოზე“ გაიმართა.

მატჩის შესახებ ბევრს ვერაფერს ვიტყვით, ირანის ნაკრების ფეხბურთელებმა კლასიკური „ავტობუსი“ ჩადგეს, არგენტინელები კი შეხვედრას მეტოქის ნახევარზე ატარებდნენ. ირანელთა მთავარი ამოცანა საკუთარი კარის უსაფრთხოება იყო და ეს თითქმის გამოუვიდოდათ კიდეც, რომ არა 91-ე წუთზე ირანელ მცველთა შეცდომა, რითაც ლიონელ მესიმ ისარგებლა და მოჭრილი დარტყმით ბურთი კარის ბადეში გაახვია.

არგენტინა  1:0  ირანი

არგენტინა: რომერი, როხა, ფერნანდესი, გარაი, საბალეტა, მასკერანო, გაგო, დი მარია (ბილია 90+3’), აგუერო (ლავეცი 78’), მესი, იგუაინი (პალასიო 78’).

ირანი: ა.ჰაგიგი, პულადი, სადეგი, ჰოსეინი, მონტარესი, ტეიმურიანი, ნეკუნამი, ჰაისაფი (რ.ჰაგიგი 87’), შოჯაეი (ჰეიდარი 77’), დეჟაგა (ჯაჰანბაკში 84’), გუჩანეჯადი.

გოლი: ლიონელ მესი (90+1’)

გაფრთხილება: ნეკუნამი (53’), შოჯაეი (73’).