2014 წლის მუნდიალის დაწყებამდე, A ჯგუფიდან გამსვლელთა შორის ხორვატია მოიაზრებოდა, მაგრამ მექსიკამ 3-ვე შეხვედრაში დამაჯერებელი, მაღალი დონის ფეხბურთი წარმოგვიდგინა და სრულიად დამსახურებულად მოიპოვა მერვედფინალში თამაშის უფლება.

ხორვატთა წინააღმდეგ გადამწყვეტი მატჩის პირველ ტაიმში მექსიკელები თავს იცავდნენ და ბურთი მეტოქეს დაუთმეს, თუმცა საკუთარ ნახევარზე დამაჯერებელმა თამაშმა მათ კარი სუფთად შეანახინა და სახიფათო კონტრშეტევების წარმოქმნის საშუალებაც მისცა.

მატჩის მეორე ნახევარში მექსიკელებმა სადავეები ხელთ იგდეს და მეტოქის ნახევარზე გადაინაცვლეს. ხორვატებს აშკარად ეტყობოდათ, რომ ბოლო წუთებში შტურმის მოწყობას გეგმავდნენ, მაგრამ ეს არ დასცალდათ. 64-ე წუთზე მატჩის მთავარი არბიტრი შეცდა, საჯარიმოში ხელით თამაში არ დააფიქსირა და ხორვატთა კარში 100%-იანი პენალტი არ დანიშნა. რამდენიმე წუთში სამართალმა იზეიმა, ჩორლუკასთან საჰაერო ორთაბრძოლა გამოცდილმა რაფა მარკესმა მოიგო და ანგარიში გახსნა. უნდა აღინიშნოს, რომ ნიკო კოვაჩის ცვლილებებმა ვერ გაამართლა, რის შემდეგაც მარჯვენა ფლანგი სრულიად აიკლეს მექსიკელებმა. მათ შეტევების რაოდენობა გაზარდეს და ზუსტად 3 წუთში, გუარდადოს გოლიც ვიხილეთ - 2:0. შეცვლაზე შემოსულმა ჩიჩარიტომ 82-ე წუთზე ანგარიში გამანადგურებელი გახადა. მატჩის მიწურულს, 87-ე წუთზე, ხორვატებმა პერიშიჩის გატანილი გოლით მხოლოდ ერთი ბურთის გაქვითვა შესძლეს. საბოლოოდ, ტაბლოზე 1:3 მექსიკელთა სასარგებლოდ დაფიქსირდა.

მექსიკის ნაკრებმა 7 ქულა მოიპოვა, ბრაზილიელებს ბურთების სხვაობით ჩამორჩა და ჯგუფიდან მეორე ადგილით გავიდა. ბურიტოს მოყვარულები პლეი ოფის პირველ შეხვედრაში ჰოლანდიის ეროვნულ ნაკრებს დაუპირისპირდებიან.

ხორვატია  1:3  მექსიკა

ხორვატია: პლეტიკოშა, ვრსალკო (კოვაჩიჩი 58’), ჩორლუკა, ლოვრენი, პრანიჩი (იელავიჩი 74’), სრნა, მოდრიჩი, რაკიტიჩი, პერიშიჩი, ოლიჩი (რებიჩი 70’), მანჯუკიჩი.

მექსიკა: ოჩოა, ფ.როდრიგესი, მარკესი, ერერა, ლაიუნი, მორენო, გუარდადო (ფაბიანი 85’), აგილარი, ვასკესი, დოს სანტოსი (ხ.ერნანდესი 62’), პერალტა (პენია 79’).

გოლები: მარკესი (72’), გუარდადო (75’), ხ.ერნანდესი (82’), პერიშიჩი (87’).

გაფრთხილებები: რაკიტიჩი (9’) - მარკესი (39’), ვასკესი (66’).

გაძევება: რებიჩი (89’)