გუშინ, კოლუმბიისა და იაპონიის შეხვედრაში, 85-ე წუთზე მოედანზე ვეტერანი მეკარე ფარიდ მონდრაგონი გამოვიდა. კარის 43 წლის დარაჯმა კამერუნელი როჟე მილას რეკორდი დაამხო და მსოფლიო ჩემპიონატის ისტორიაში ყველაზე ასაკოვანი მოთამაშე გახდა.
„ძალიან მოხარული ვარ იმით, რაც ჩვენს ქვეყანაში ხდება. მიხარია რომ რეკორდსმენი გავხდი. ეს მიღწევაა როგორც ჩვენი ქვეყნისთვის, ასევე მთელი მსოფლიოსთვის. ამაყი ვარ, რომ კოლუმბიელთა სტატისტიკაში წვლილი მიმიძღვის.
როცა მესამე გოლის გატანა მოვახერხეთ, ჩვენმა მწვრთნელმა მითხრა: „მალე, შენ გადიხარ". ხელთათმანები ავიღე და ემოციები ძლივს მოვთოკე. ახლა წინ უნდა ვიყუროთ და ურუგვაისთან თამაშისთვის მოვემზადოთ.
ჩემთვის ძალიან სასიამოვნოა, რომ ისევე როგორც ჩემი თანამოქალაქენი, ახლა მთელი მსოფლიოც მიცნობს. დიდი მადლობა ყველას", - განაცხადა მანდრაგონმა.
შეგახსენებთ, რომ მანდრაგონი კოლუმბიელთა განაცხადში ჯერ კიდევ ბარსელონაში გამართულ ოლიმპიურ თამაშებზე იყო, ასევე იმყოფებოდა აშშ-ში 1994 წლის მსოფლიო ჩემპიონატზე, თუმცა მისი დებიუტი, მხოლოდ და მხოლოდ, საფრანგეთში გამართულ 1998 წლის მსოფლიო ჩემპიონატზე შედგა.
