მიუნხენის „ბაიერნისა" და გერმანიის ეროვნული ნაკრების თავდამსხმელმა ტომას მიულერმა განასთან დაპირისპირებისას მიღებული ტრავმა მოიშუშა და ჟურნალისტებს სამუნდიალო გეგმებზე ესაუბრა.

„უკვე კარგად ვარ მიუხედავად იმისა, რომ მოკრივეს ვგავარ. ჩვენ, ჯგუფში გამარჯვება გვინდა. სიუჟეტის სხვაგვარ განვითარებაზე საუბარი ზედმეტია!

ამ ტურნირში საოცრად ფრთხილად უნდა იყო, რადგან შესაძლოა გაცილებით ადრე დასრულდეს, ვიდრე წარმოგიდგენია. მე რომ შემომხედავთ, მაშინვე ნათელია, რომ ფრე ვარიანტი არაა.

 ისე მოვეკიდებით შეხვედრას, როგორც საჭიროა. ჩვენი სტილი გვაქვს და მას შევინარჩუნებთ. ჩემი მიზანი არა ბომბარდირობა, არამედ მსოფლიო ჩემპიონობაა", - განაცხადა მიულერმა.