Vesti.az ავრცელებს ინფორმაციას იმის თაობაზე, რომ აზერბაიჯანელ მოკრივეებს ცხინვალში გამართულ ტურნირში მონაწილეობა არ მიუღიათ. აზერბაიჯანის კრივის ფედერაციამ უარყო, რომ რომელიმე სპორტსმენი ცხინვალში გაემგზავრა. მიზეზად კი ის დაასახელეს, რომ ეს სეპარატისტული რეგიონია.

„არც მოკრივეები აზერბაიჯანის ნაკრებიდან და არც სპორტსმენები აზერბაიჯანული კლუბებიდან ცხინვალში არ გამგზავრებულან, რადგან ეს სეპარატისტული რეგიონია", - განუცხადეს Vesti.az-ს აზერბაიჯანული კრივის ფედერაციაში.

25 ივნისს, ოკუპირებულ ცხინვალის რეგიონში, სამხრეთ ოსეთის პრეზიდენტის თასზე კრივში საერთაშორისო ტურნირი გაიმართა, რომელშიც მიწვეულნი იყვნენ მოკრივეები ყირიმიდან, აფხაზეთიდან, დნესტრისპირეთიდან, აზერბაიჯანიდან, რიაზანიდან, ვლადიკავკაზიდან, ყირგიზეთიდან და ჩეხეთიდან.