ჰოლანდიის, კოლუმბიისა და არგენტინის ნაკრებებს ბელგიაც შეუერთდა. ეს იმ გუნდების ჩამონათვალია, რომლებიც შემდეგ ეტაპზე 9-9 ქულით გავიდნენ.

გუშინ, თბილისის დროით 00:00 საათზე, ჯგუფური ეტაპის უკანასკნელი მატჩები გაიმართა. ერთმანეთს ბელგია და სამხრეთ კორეა დაუპირისპირდნენ. სამხრეთ კორეას ჯგუფიდან გასვლის მინიმალური შანსი ჰქონდა. ამისათვის, პარალელური შეხვედრა ალჟირსა და რუსეთს შორის ფრედ უნდა დასრულებულიყო, ხოლო მათ ბელგია დიდი ანგარიშით გაენადგურებინათ. პირველი პირობა შესრულდა, თუმცა სამხრეთ კორეამ თავად ვერ შეძლო მეტოქის დამარცხება.

78-ე წუთზე, შეხვედრის ერთადერთი გოლი ვერტონგენმა გაიტანა. ბელგიელთა მცველმა გამოვარდნილ ბურთზე ყველას დაასწრო და ბურთი მეტოქის კარში გადაგზავნა.

შედეგად, ბელგიელები (9 ქულით) ჯგუფიდან პირველი ადგილით გავიდნენ, მათ კვალდაკვალ, პლეი ოფში ალჟირის ნაკრები ითამაშებს, რუსეთი და სამხრეთ კორეა კი მუნდიალს დაემშვიდობნენ.

სამხრეთ კორეა  0:1  ბელგია

სამხრეთ კორეა: სეუნგ გიუ კიმი, ჯეონგ ჰო ჰონგი, იონგ ლი, სუკ იუნგ იუნი, იუნგ გვონ კიმი, სუნგ იუენგ კი, ჰეუნგ მინ სონი (დონგ ვონ ჯი 73'), კოოკ იუნგ ჰანი (კეუნ ჰო ლი 46'), ჩუნგ იონგ ლი, ჯა ჩეოლ კო, შინ ვოკ კიმი (ბო კიუნგ კიმი 66').

ბელგია: კურტუა, ვან ბუიტენი, ვერტონგენი, ლომბარტსი, ვანდენ ბორე, ფელაინი, დემბელე, დეფური, მერტენსი (ორიგი 60'), მირალაში (აზარი 88'), ჯანუზაი (ჩადლი 60').

გოლი: ვერტონგენი (78')

გაფრთხილებები: ჰონგი (35'), დემბელე (50').

მთავარი არბიტრი: ბენჯამინ უილიამსი (ავსტრალია)