ავტორიტეტული გამომცემლობა goal.com იუწყება, რომ „ბარსელონასა" და „ლივერპულს" შორის შეთანხმება საბოლოოდ შედგა. მომქანცველი მოლაპარაკებები დასრულდა და კლუბები ტრანსფერის საბოლოო ღირებულებაზე შეჯერდნენ.

ურუგვაელი ფორვარდი ლუის სუარესი მომავალი სეზონიდან კატალონიური კლუბის ღირსებას დაიცავს, მერსესაიდელები კი, მის სანაცვლოდ, 88 მილიონ ევროს მიიღებენ.

„ბარსა" სუარესის ტრანსფერში 27 წლის ალექსის სანჩესის ჩართვას აპირებდა, თუმცა ჩილელმა ფორვარდმა „არსენალში" 40 მილიონი ევროს სანაცვლოდ გადასვლა არჩია.

„ლივერპულს" აღნიშნული თანხა ნამდვილად წაადგება მიმდინარე სატრანსფერო ფანჯრის დროს გუნდის გასაძლიერებლად. კლუბმა ფაქტობრივად უკვე მიაღწია შეთანხმებას „ბენფიკას" გარემარბ ლაზარ მარკოვიჩთან, „ლილეს" ფორვარდ დივოკ ორიჯისა და „საუთჰემპტონის" მცველ დეიან ლოვრენთან.

წყაროს ცნობით, კლუბები ტრანსფერს ოფიციალურად უახლოეს დროში გაახმაურებენ.