მეკარე გილიერმო ოჩოამ პრესას განუცხადა, რომ არ განიცდის სხვადასხვა კლუბებისგან წინადადებების ნაკლებობას.
ახლა ოჩოა თავისუფალი აგენტია, რადგან დაუსრულდა კონტრაქტი ფრანგულ „აიაჩოსთან". აქამდე მოთამაშემ განაცხადა, რომ ლიგა 1-ში კარიერის გაგრძელება სურს, მაგრამ სხვა ქვეყნის გუნდების შემოთავაზებებსაც განიხილავს.
„ჩემს ხელთ რამდენიმე შემოთავაზებაა. არიან ფრანგებიც და უცხოური კლუბებიც, მაგრამ ჯერ არაფერი გადამიწყვეტია. დროა საჭირო, რათა ყველაფერი კარგად გავაანალიზო და სწორი გადაწყვეტილება მივიღო.
ვფიქრობ, რომ ყველაფერს ორი კვირა დასჭირდება. ამის შემდეგ, პრეს-კონფერენციას გავმართავ და ჩემს გადაწყვეტილებას გავასაჯაროებ. ჩემს მომავალ გუნდში საინტერესო პროექტი უნდა იყოს და მე თავს იქ კარგად უნდა ვგრძნობდე", - განაცხადა ოჩოამ.
შეგახსენებთ, რომ ოჩოამ თავი მსოფლიო ჩემპიონატზე მექსიკის რიგებში გამოიჩინა.
