გუშინ, 20:00 საათზე, მიხეილ მესხის სახელობის სტადიონზე, ევროპა ლიგის პირველი საკვალიფიკაციო ეტაპის განმეორებითი შეხვედრა გაიმართა. საჩხერის „ჩიხურამ" საკუთარ კედლებში მაკედონიური „ტურნოვო" მიიღო. ქართველებმა პირველ შეხვედრაში, სტუმრად, მნიშვნელოვანი გამარჯვება მოიპოვა - 0:1 და მიუხედავად იმისა, რომ შემდეგ ეტაპზე გასასვლელად ფრეც აძლევდა ხელს, საჩხერლებმა მეტოქეს საკმაოდ დამაჯერებლად გადაურბინეს.

ანგარიში საწყის წუთებზე გაიხსნა. მე-6 წუთზე, ლაშა კუჭუხიძის გამოზომილი გადაცემით, გიორგი გაბედავამ ისარგებლა და თავური დარტყმით პირველი გოლი გაიტანა. გატანილი გოლის შემდეგ, „ჩიხურას" ფეხბურთელების უპირატესობას დაეუფლნენ და საფრთხეს არაფერი მოასწავებდა, თუმცა 45-ე წუთზე, ალექსანდარ პანდოვსკიმ წონასწორობა აღადგინა.

სოსო ფრუიძის გუნდმა მეორე ტაიმშიც არაფერი დათმო და მეტოქეზე წნეხი კიდევ უფრო გაზარდა. 67-ე წუთზე, გიორგი გაბედავამ დუბლი შეასრულა, 75-ეზე კი, გიორგი რეხვიაშვილმა გამოიჩინა თავი.

საერთო ჯამში, საჩხერლებმა 4:1 იმარჯვეს და ევროპა ლიგის მეორე საკვალიფიკაციო ეტაპზე ასპარეზობის უფლება მოიპოვეს, სადაც ისინი თურქულ „ბურსასპორს" დაუპირისპირდებიან. აღნიშნული შეხვედრები 17 და 24 ივლისს გაიმართება.