გუშინ, თბილისის დროით 21:00 საათზე, ქალაქ ვლორაში, ადგილობრივმა „ფლამურტარმა" ბოლნისის „სიონს" უმასპინძლა. გუნდებს შორის პირველი დაპირისპირება, მიხეილ მესხის სახელობის სტადიონზე ქართულმა კლუბმა 2:3 დათმო, განმეორებით შეხვედრაში კი ორბურთიანი გამარჯვება სჭირდებოდა.

ბოლნისელები ორივე თამაშის ჯამში, მეტოქეს აშკარად ჯობდნენ, თუმცა ჯერ იყო და საკუთარ კედლებში 2:1-ის შემდეგ, სადავეები ხელიდან გაუშვეს და ორი უპასუხო გოლი მიიღეს, გუშინ კი შეხვედრას 85-ე წუთამდე იგებდნენ, თანაც ბოლოს სასურველი ანგარიშით, თუმცა აქაც უმტყუნა ბედმა ქართულ კლუბს და შემდეგ ეტაპზე ალბანელები გავიდნენ.

პირველი გოლის გატანა 56-ე წუთზე, შეცვლაზე ახლად შემოსულმა ჯაბა უგულავამ მოახერხა, 83-ე წუთზე კი, ტაულანდ კუქის ავტოგოლის წყალობით ბოლნისელები სასურველ ორბურთიან უპირატესობას დაეუფლნენ, თუმცა ზუსტად 2 წუთში, საკუთარ კარში მიიღეს გოლი. თავი არდიტ შეჰაიმ გამოიჩინა და საკუთარ გუნდს ევროპა ლიგის მეორე საკვალიფიკაციო ეტაპზე გაუძღვა.