დღეს, საქართველოს ფეხბურთის ფედერაციის აღმასრულებელმა კომიტეტმა მნიშვნელოვანი გადაწყვეტილება მიიღო. საბოლოოდ გადაწყდა, რომ საქართველოს 2014/2015 წლების ეროვნული ჩემპიონატი 16-გუნდიანი იქნება. შესაბამისად, ახალი სეზონიდან უმაღლეს ლიგაში ითამაშებენ ქობულეთის „შუქურა“, ფოთის „კოლხეთი“, ბათუმის „დინამო“ და „სამტრედია“. ამის შესახებ ინფორმაციას სფფ-ის ოფიციალური ვებგვერდი ავრცელებს.

აღმასკომის დავალებით, სფფ-ის საშეჯიბრო განყოფილებამ და გენერალურმა სამდივნომ სხდომაზე 12, 14 და 16-გუნდიანი ჩემპიონატების დებულებები წარადგინეს. საკმაოდ ხანგრძლივი განხილვის შემდეგ, 16-გუნდიანი ჩემპიონატის ფორმატი დამტკიცდა. დებულების თანახმად, ახალი სეზონიდან პირველ ლიგაში 20 გუნდი ითამაშებს. ჩემპიონატის დებულების სრული ვერსია გამოქვეყნდება სფფ-ის ოფიციალურ ვებ-გვერდზე.

სხდომაზე განიხილეს სკ „ზესტაფონის“ საკითხიც - კლუბის დავალიანებები ფეხბურთელებისა და მწვრთნელების მიმართ. სხდომას ასევე ესწრებოდნენ ფეხბურთელთა უფლებადამცველი ორგანიზაციების წარმომადგენლებიც.

სკ „ზესტაფონს“ მიეცა ვადა, 26 ივლისამდე დაფაროს არსებული დავალიანებები. წინააღდეგ შემთხვევაში, მას შეუწყდება სფფ-ის წევრობა და ამოქმედდება წესდებით გათვალისწინებული სანქციები.

სფფ-ის პრესსამსახური