კატალონიური კლუბის ახალწვეულმა ივან რაკიტიჩმა განაცხადა, რომ ყველა ტურნირში, რომელშიც „ბარსელონა" იასპარეზებს, გამარჯვებას გეგმავს.

გასულ სეზონში კატალონიელები ტიტულების გარეშე დარჩნენ, ამიტომაც შემდეგ წელს ხორვატის აზრით რაიმეს მოგება აუცილებელია. ივანი პრესკონფერენციაზე ჟურნალისტებს გაესაუბრა.

„წავიკითხე, რომ მიმდინარე წელს „ბარსელონამ" ყველაზე მეტი თანხა დახარჯა, ვიდრე სხვებმა. ამიტომაც, პირველი ფრაზა, რომელიც აქ მოვისმინე იყო, რომ უნდა მოვიგოთ ყველაფერი, რაც შესაძლებელია. ამისთვის მზად მინდა ვიყო. გავიმეორებ, რომ აქ იმისთვის არ ვარ, რომ ვინმე შევცვალო. „ბარსაში" მოვედი იმისთვის, რომ ივან რაკიტიჩი ვიყო. ხავის შემცვლელობაზე საუბარი სისულელეა, რადგან იგი კვლავ კლუბშია.

ერთი სული მაქვს, როდის შევხვდები თანაგუნდელებს და იმ დიდი საფეხბურთო ფილოსოფიის ნაწილი გავხდები, რომელზეც ამდენს საუბრობენ. მინდა მათგან ვისწავლო, მაგრამ ამავდროულად ჩემი წვლილი შევიტანო საერთო საქმეში და წარმატების მოპოვებაში. უკვე ვესაუბრე მთავარ მწვრთნელს და მან მითხრა, რომ „ბარსა" 4-3-3 სქემით ითამაშებს. შესაბამისად, შემიძლია იმედი ვიქონიო ნახევარდაცვის ერთ-ერთ პოზიციაზე.

მსოფლიო ჩემპიონატიდან ჩვენი გამოვარდნის შემდეგ, საკმარისი დრო მქონდა, რათა კლუბში მომუშავეებს გავცნობოდი. ხანგრძლივი საუბრები მქონდა ანდონი სუბისარეტოსთან. ნახევარმცველი კლუბისთვის ძალიან მნიშვნელოვანი პოზიციაა და მიხარია, რომ მისი ნაწილი ვარ", - განაცხადა რაკიტიჩმა.