16 ივლისს, თბილისის „დინამო" საშინაო მატჩით სტარტს აიღებს ჩემპიონთა ლიგის მეორე საკვალიფიკაციო ეტაპზე. ქართველთა მეტოქე ყაზახეთის „აქტობე" იქნება.
გუნდებმა გუშინ საღამოს მატჩის წინა ვარჯიში და პრესკონფერენცია გამართეს. ჟურნალისტებს ქართული ფეხბურთის ფლაგმანის მხრიდან მთავარი მწვრთნელი მიხალ ბილეკი და კარის გამოცდილი დარაჯი გიორგი ლორია გაესაუბრნენ. შეგახსენებთ, რომ დღევანდელი შეხვედრა ჩეხი სპეციალისტისთვის სადებიუტო იქნება.
„ეს ძალიან მნიშვნელოვანი მატჩია. ჩვენი მთავარი მიზანი ევროთასებზე რაც შეიძლება შორს წასვლაა. ხვალინდელი შეხვედრა ძალიან რთული იქნება ჩვენთვის, ამასთანავე, იგი ჩემთვის სადებიუტოა. ჩვენმა მეტოქემ ორიოდე კვირის წინ 1:7 წააგო, მაგრამ ეს არ უნდა გვიქმნიდეს იმის ილუზიას, რომ გუნდი დასუსტებულია", - განაცხადა მიხალ ბილეკმა.
„არ შეიძლება ჩვენი გუნდის მომზადება იმით განისაზღვროს, რომ შეკრებაზე ყველა მატჩი წავაგეთ. გამარჯვებები არ იყო ჩვენი შეკრების მიზანი. ახალი მწვრთნელი გვყავს, ფაქტობრივად ხელახლა ჩამოყალიბდა გუნდი და დრო დაგვჭირდა, რათა მოეძებნა ტაქტიკა, რომელსაც ჩვენს ფეხბურთელებს მოარგებდა. შეიძლება ამ თამაშზე ჩვენი 100% ვერ ვაჩვენოთ, მაგრამ ორი თამაშის ჯამში, ვფიქრობ, რომ შემდეგ ეტაპზე გავალთ", - აღნიშნა გიორგი ლორიამ.
„ვიცით, რა დონის გუნდთან მოგვიწევს გაჯიბრება, რაოდენ დიდი ტრადიციების მქონე მეტოქე გვყავს და პატივს ვცემთ. ჩვენს გუნდში ყველაფერი რიგზეა. ფეხბურთელები კარგ ფსიქოლოგიურ განწყობაზე არიან და რაც მოხდა წინა ტურში, უკვე დავიწყებულია", - განაცხადა „აქტობეს" მთავარმა მწვრთნელმა ვლადიმირ გაზაევმა.
