დღეს, 16 ივლისს, თბილისის დროით 21:00 საათზე, ჩემპიონთა ლიგის მეორე საკვალიფიკაციო ეტაპის შეხვედრა გაიმართება. „დინამო არენაზე" ერთმანეთს თბილისის „დინამო" და ყაზახური „აქტობე" დაუპირისპირდებიან.
როგორც იცით, ქართული ფეხბურთის ფლაგმანს ახალი მთავარი მწვრთნელი ჰყავს - მიხელ ბილეკი. გამოცდილმა ჩეხმა სპეციალისტმა გუნდთან ერთად უკვე გამართა შეკრება ჰოლანდიაში, რომლითაც საკმაოდ კმაყოფილია. აღსანიშნავია, რომ ჩვენს მეტოქესაც გარკვეული პრობლემები აქვს ამ მხრივ. გუნდმა წინა ტურში 1:7 წააგო, რის შემდეგაც მთავარი მწვრთნელი გადადგა, მის შემცვლელად კი ვლადიმირ გაზაევი დაინიშნა. ასე რომ, ყაზახებს გაცილებით ნაკლები დრო ჰქონდათ მწვრთნელთან გაცნობისათვის.
გუშინ გუნდებმა მატჩის წინა ვარჯიში გამართეს. როგორც ზემოთ აღვნიშნეთ, გაზაევს საკმაოდ მცირე დრო ჰქონდა გუნდში ცვლილებების შესატანად, ამიტომაც, სავარაუდოდ „აქტობე" ჩვეული 4-2-3-1 ტაქტიკით ითამაშებს. ამ მოსაზრებას ისიც აძლიერებს, რომ ყაზახები არ გარისკავენ თამაშის გახსნას და განმეორებითი თამაშისთვის შეხვედრის სასურველი ანგარიშით დასრულებას შეეცდებიან.
თბილისის „დინამოში" მოსვლის დღიდან, მიხალ ბილეკი ამტკიცებდა, რომ გუნდი სავარაუდოდ შეტევაზე ორიენტირებულ, კლასიკურ 4-4-2 ტაქტიკით ითამაშებდა, თუმცა გუშინდელმა ვარჯიშმა ეს მოსაზრება ეჭქვეშ დააყენა.
როგორც ჩანს, ჩეხი სპეციალისტი 2014 წლის მუნდიალზე პოპულარულმა სქემა 3-5-2-მა მოხიბლა და „დინამოს" ამ ტაქტიკაზე გადაწყობას ცდილობს. ვარჯიშზე კარგად გამოჩნდა, თუ ვის უნდა ველოდოთ ძირითად შემადგენლობაში.
კარს უდაოდ გიორგი ლორია დაიცავს. დაცვის ხაზში გიორგი გველესიანი, ლაშა თოთაძე და გუნდის ახალი შენაძენი რადეკ დოსოუდილი განლაგდებიან. საინტერესოა, რომ მარჯვენა ფლანგიდან მოხსნილია „დინამოს" შემადგენლობაში მყოფი ერთადერთი მარჯვენა მცველი დავით ხურცილავა. თბილისური კლუბი 2 საყრდენით ითამაშებს, რომლებსაც გიორგი პაპავა და ირაკლი ძარია წარმოადგენენ. მარცხენა ფლანგს სავარაუდოდ ლაშა შერგელაშვილი გააკონტროლებს, რადგან დავით კვირკველია ტრავმირებულია, მარჯვნივ კი, ელგუჯა გრიგალაშვილი განთავსდება.
შემტევი ნახევარმცველის პოზიციაზე ბილეკმა, როგორც ჩანს, გიორგი ჯანელიძის დაყენება გადაწყვიტა. ამ ფეხბურთელს იგი ტესტ-მატჩებშიც ხშირად ენდო და როგორც ჩანს, ძალიან მოეწონა. რაც საკმაოდ დიდ კითხვის ნიშნებს ბადებს.
ჩეხმა სპეციალისტმა საინტერესო გადაწყვეტილება მიიღო შემტევ დუეტზეც, რომელსაც გიორგი მერებაშვილი და პატრიკ ვუო წარმოადგენენ. აშკარაა, რომ „დინამოს" წინა მწვრთნელები ვუოს პოტენციალს არასწორად იყენებდნენ, კოტ დ'ივუარელმა კი, შეკრებაზე საუკეთესოდ ითამაშა და ბილეკის გული მოიგო. რაც შეეხება გიორგი მერებაშვილს, სავარაუდოდ ჩეხი სპეციალისტი ქართველის ინდივიდუალური ოსტატობის იმედზეა, თანაც, ყაზახები ხშირად უსვამენ ხაზს, რომ ქართველები ტექნიკურები არიან და ამის შიში აქვთ.
აქვე აღვნიშნავთ, რომ ტრავმირებულია ხისკო, თუმცა მან გუშინდელ ვარჯიშში სრული დატვირთვით იმუშავა და სავარაუდოდ, საჭიროების შემთხვევაში სწორედ იგი და მარცვალაძე გააძლიერებენ „დინამოს" შეტევებს.
გთავაზობთ თბილისის „დინამოს" სავარაუდო შემადგენლობას დღევანდელ მატჩში:
თბილისის „დინამომ“ გუშინ მატჩისწინა ვარჯიში ჩაატარა, დღეს კი, 21:00 საათზე, „დინამო არენა“ ჩემპიონთა ლიგის მეორე საკვალიფიკაციო მატჩს უმასპინძლებს.
