„ბარსელონას" ყოფილი მთავარი მწვრთნელი ხერარდო მარტინო, არგენტინის ნაკრებში, ალეხანდრო საბელიას შემცვლელ კანდიდატებს შორის პირველ ნომრად მოიაზრება.
საბელიას წასვლასთან დაკავშირებით საბოლოო პასუხი უცნობია, რადგან მწვრთნელმა, რომელმაც გუნდი მსოფლიო ჩემპიონატის ფინალში გაიყვანა, დრო მოითხოვა, რათა უკეთ აწონ-დაწონოს ყველაფერი. მიუხედავად ამისა, საბელიას აგენტმა ჯერ კიდევ ფინალამდე განაცხადა, რომ საბელია ნაკრებიდან წავიდოდა.
Ole-სთან საუბრისას, პარაგვაის ფეხბურთის ფედერაციის ვიცე-პრეზიდენტმა განაცხადა, რომ ტატა მარტინო ვეღარ გაწვრთნის პარაგვაის ნაკრებს, რადგან უკვე მისცა სიტყვა არგენტინული ფეხბურთის ასოციაციას.
შეგახსენებთ, რომ გასულ სეზონში მარტინო „ბარსელონას" წვრთნიდა, თუმცა ჩემპიონატში მეორე ადგილი, ჩემპიონთა ლიგიდან მეოთხედფინალურ ეტაპზე გამოვარდნა და ესპანეთის თასის ფინალში მარცხი იმის მიზეზად იქცა, რომ მარტინომ პოსტი დატოვა.
