ბათუმის ტექნოლოგიური უნივერსიტეტის შენობა, აჭარის მთავრობის გადაწყვეტილებით, იჯარის წესით გაიცემა. განცხადება ამის შესახებ აჭარის მთავრობის თავმჯდომარემ გააკეთა. არჩილ ხაბაძემ დღეს შენობა რეგიონის ფინანსთა და ეკონომიკის მინისტრთან ერთად დაათვალიერა და განაცხადა, რომ შენობა, სპეციალისტების შეფასებით, უნივერსიტეტისთვის შეუსაბამოა. მისივე განცხადებით, არ განიხილება აღნიშნულ შენობაში ბათუმის მერიისა და უმაღლესი საბჭოს განთავსების იდეა. მთავრობის თავმჯდომარის თქმით, უკვე არსებობს რამდენიმე დაინტერესებული ინვესტორი, რომლებთანაც მიმდინარეობს მოლაპარაკებები, თუმცა, შენობა საქართველოს ეკონომიკისა და მდგრადი განვითარების სამინისტროს ბალანსზე ირიცხება და საბოლოო გადაწყვეტილებას მისი ფუნქციური დატვირთვის შესახებ ერთობლივად მიიღებენ. შენობის ასაშენებლად 78 მილიონი ლარი უკვე დახარჯულია, სამშენებლო კომპანიას მის დასასრულებლად 6-მილიონიანი ვალდებულება აქვს. თუმცა, არჩილ ხაბაძის შეფასებით, შენობის საბოლოო დასრულებისთვის დამატებით კიდევ 6 მილიონი იქნება საჭირო, რომელიც, შესაძლოა, მოიჯარე ინვესტორის ვალდებულებად განისაზღვროს ან აჭარის მთავრობამ გამოყოს. შეგახსენებთ, რომ საქართველოს პრეზიდენტმა მიხეილ სააკაშვილმა ბათუმში ტექნოლოგიური უნივერსიტეტი 2012 წლის სექტემბერში გახსნa. ამერიკული და ევროპული სტანდარტების შესაბამის თანამედროვე ტექნოლოგიურ უნივერსიტეტში ძირითადი მიმართულებები სწორედ ტექნოლოგიური, ინფორმაციული და საინჟინრო დისციპლინები უნდა ყოფილიყო.