საქართველოს პრემიერ-მინისტრმა ირაკლი ღარიბაშვილმა დაზვერვის სამსახურის ხელმძღვანელობას, მთელ პირად შემადგენლობას დღევანდელი დღე მიულოცა.
„ჩემთვის დიდი პატივია, მივულოცო დღევანდელი დღე იმ ადამიანებს, რომელთა დევიზია - სამშობლო, ღირსება, თავდადება.
საქართველოს დაზვერვის მოსამსახურეებისთვის საკუთარ სიცოცხლეზე მეტად, ქვეყნის ინტერესები და მისი უსაფრთხოებაა უპირველესი. სახელმწიფოს ერთგულება და უსაფრთხოების უზრუნველყოფა დიდად განაპირობებს ქვეყნის სტაბილურობას, დემოკრატიულ განვითარებას, ადამიანთა მშვიდობიან თანაცხოვრებას.
საქართველოს დაზვერვის სამსახურში მუშაობა ერთდროულად პატივიცაა და უდიდესი პასუხისმგებლობაც და ამას კარგად აცნობიერებს თითოეული თანამშრომელი, როდესაც დაკისრებულ მოვალეობებს ასრულებს.
კიდევ ერთხელ ვულოცავ დღევანდელ დღეს დაზვერვის სამსახურის ხელმძღვანელობას, მთელ პირად შემადგენლობას და განსაკუთრებულ მადლობას ვუხდი მათ ჩვენი ქვეყნის უსაფრთხოების განმტკიცებაში შეტანილი წვლილისათვის", - აღნიშნულია ირაკლი ღარიბაშვილის განცხადებაში.
