მედიაჰოლდინგ „რეპორტიორის" გენერალურმა დირექტორმა გიორგი მამაცაშვილმა მთავარ პროკურატურაში 2007-2008 წლებში ტელეკომპანია „იმედის" ჟურნალისტების დაშანტაჟების ფაქტებზე სკანდალური აუდიოჩანაწერები წარადგინა. აუდიომასალა 11 ფაილს მოიცავს.

როგორც მამაცაშვილმა ჟურნალისტებს განუცხადა, საგამოძიებო უწყებამ უნდა მოახდინოს აუდიოჩანაწერებში მოყვანილ პირთა ხმათა იდენტიფიცირება და გამოავლინოს ამ პირთა ვინაობა, რომლებიც „იმედის" ჟურნალისტების მოსყიდვისა და შანტაჟის ფაქტებში მონაწილეობდნენ. მამაცაშვილის ინფორმაციით, „დროების" ჟურნალისტების: დაჩი გრძელიშვილის, ლიზი ვაჩნაძის, სოსო ბარნაბიშვილის, რუსუდან ცხომელიძისა და ზაზა წულაძის დაშანტაჟების საქმეში ფიგურირებენ ყოფილი მაღალჩინოსნები გიგა ბოკერია, გიგი უგულავა და გივი თარგამაძე. მამაცაშვილის თქმითვე, ყოფილი ხელისუფლების მიზანს წარმოადგენდა ის, რომ ამ 5 ჟურნალისტს პროკურატურაში საჩივარი შეეტანა „იმედის" წინააღმდეგ და სწორედ ამაში უხდიდნენ თანხას.

„რეპორტიორის" გენერალურმა დირექტორმა სკანდალური აუდიოჩანაწერები რამდენიმე დღის წინ გაასაჯაროვა.