კავკასიის უნივერსიტეტში, პროფესორ მზია მიქელაძის სახელობის საკონფერენციო დარბაზში, დოკუმენტური ფილმის „შინდისის გმირები" ჩვენება გაიმართა, რომელიც ეძღვნება 2008 წლის 11 აგვისტოს შინდისში მომხდარ ტრაგედიას.
ფილმი სტუდენტებს ფილმის ავტორმა და პროდიუსერმა, რუსთაველის თეატრის მსახიობმა ედმონდ მინაშვილმა წარუდგინა.
„შინდისის გმირების" ჩვენებით დაიხურა ანექსიის წინააღმდეგ კვირეული, რომელიც კავკასიის უნივერსიტეტის სტუდენტური თვითმმართველობის ორგანიზებით გაიმართა.
კავკასიის უნივერსიტეტი მეოთხე უმაღლესი საგანმანათლებლო დაწესებულებაა, სადაც „შინდისის გმირების" ჩვენება შედგა. ფილმი უკვე იხილეს თსუ-ს, სამედიცინოსა და ტექნიკური უნივერსიტეტების სტუდენტებმა.
„რეპორტიორი" საკუთარ მკითხველსა და მაყურებელს უახლოეს დღეებში შესთავაზებს ფილმს „შინდისის გმირები".
