თბილისს ახალი - ნიკო გომელაურის სახელობის სკვერი შეემატა. თავისუფალი თეატრისა და გრიბოედოვის თეატრის მიმდებარე ტერიტორიაზე, მსახიობისა და პოეტის სახელობის ახალი სკვერის გახსნას თბილისის მერი დავით ნარმანია, საკრებულოს თავმჯდომარე გიორგი ალიბეგაშვილი, საქართველოს კულტურისა და ძეგლთა დაცვის მინისტრის მოადგილე მანანა ბერიკაშვილი, ნიკო გომელაურის ოჯახის წევრები და ახლობლები, თავისუფალი ტეატრის მსახიობები და ნიკო გომელაურის შემოქმედების თაყვანისმცემლები ესწრებოდნენ.
ახალ სკვერში ნიკო გომელაურის ცხოვრებისა და მოღვაწეობის ამსახველი ფოტო-გამოფენა გაიმართა.
დედაქალაქის მერიის ინიციატივით, ნიკო გომელაურის სკვერის კეთილმოწყობის სამუშაოები თბილისის განვითარების ფონდმა 2014 წლის ზაფხულში დაიწყო და 2015 წლის აპრილის დასაწყისში დასრულდა. პროექტის ავტორია თბილისის მერიის არქიტექტურის სამსახურის უფროსი ნინო ღოღობერიძე. ხოლო მსახიობის მონუმენტი მოქანდაკე როკო იმერლიშვილის ავტორობით დაიდგა.
ცნობილი ქართველი მსახიობი და პოეტი ნიკო გომელაური 1970 წელს დაიბადა. 1992 წელს დაამთავრა შოთა რუსთაველის თეატრისა და კინოს უნივერსიტეტი. მუშაობდა გრიბოედოვის თეატრსა და თავისუფალ თეატრში. იყო კოტე მარჯანიშვილის პრემიის ლაურეატი.
2009 წელს მას აღმოუჩინეს ფილტვის კიბო. ნიკო გომელაური 2010 წლის 13 აპრილს, ხანგრძლივი ავადმყოფობის შემდეგ გარდაიცვალა.
