რამდენიმე წუთის წინ შვეიცარიის ქალაქ ნიონში დასრულა „უეფა"-ს ევროპა ლიგის საკვალიფიკაციო ეტაპის წილისყრა.

2014/2015 წლების სეზონში, საქართველოს ეროვნული ჩემპიონატის მესამეადგილოსანი და დავით ყიფიანის თასის მფლობელი თბილისის „დინამო" აზერბაიჯანულ „გაბალას" დაუპირისპირდება.

„გაბალამ" აზერბაიჯანის პრემიერ ლიგის წლევანდელ სეზონში 54 ქულით მესამე ადგილი დაიკავა და მეორეადგილოსან ბაქოს „ინტერს" 9 ქულით ჩამორჩა. თბილისელთა შესაძლო მეტოქეთა შორის აზერბაიჯანული კლუბი ყველაზე ძლიერი გახლავთ, თუმცა, თუ გია გეგუჩაძის შეგირდებს ევროსარბიელზე რაიმეს მიღწევა სურთ, ასეთი დონის მეტოქეებს უპრობლემოდ უნდა გასცდნენ.

„გაბალა" საკმაოდ ახალგაზრდა კლუბია. იგი 2005 წელს დაარსდა და მისი ისტორია მხოლოდ და მხოლოდ 10 წელს ითვლის. მიუხედავად ამისა, იგი საკმაოდ მებრძოლ გუნდს წარმოადგენს, რომელიც საკმაოდ პროგრესირებს და უკვე მეორე წელია აზერბაიჯანის პირველობაზე მესამე ადგილს იკავებს.

ევროპა ლიგის გასულ საკვალიფიკაციო ეტაპზე „გაბალა" „შიროკი ბრიეგს" დაუპირისპირდა და ორი მატჩის ჯამში 0:5 დამარცხდა.

პირველ მატჩს თბილისელები „დინამო არენაზე" უმასპინძლებენ.