„საზოგადოებრივ მაუწყებელზე" „წითელი ზონა" ფინანსური პრობლემების გამო დაიხურა, რომელიც გიორგი გვახარიას საავტორო გადაცემას წარმოადგენდა.

როგორც „საზოგადოებრივი მაუწყებლის" გენერალური დირექტორის მოვალეობის შემსრულებელი თამაზ ტყემალაძე აცხადებს,  „წითელი ზონა" მაუწყებელს ძვირი უჯდება და ჩანაცვლდება უფრო მარტივი გადაცემით.

გადაცემის ავტორი და წამყვანი გოგი გვახარია ამბობს, რომ „საზოგადოებრივი მაუწყებლის" დირექციას გადაცემის დახურვის თაობაზე ოფიციალურად არ უცნობებია.

გავრცელებული ინფორმაციით, მაუწყებელმა კიდევ სამი გადაცემა დახურა. თამაზ ტყემალაძის თქმით, არხის ხელმძღვანელობის გადაწყვეტილება მოგვიანებით გახდება ცნობილი.

შეგახსენებთ, რომ გადაცემა „წითელი ზონა" რადიო „თავისუფლებისა" და „საზოგადოებრივი მაუწყებლის" ერთობლივი პროექტი იყო.