რუსმა სამხედროებმა რუსეთ-საქართველოს დამაკავშირებელი რკინიგზის აფხაზეთის მონაკვეთის დასუფთავება დაიწყეს.
აფხაზეთის რკინიგზის ე.წ. სამმართველოს დირექტორის მოადგილე იგორ მარღანიამ განაცხადა, რომ სამხედროები ოჩამჩირიდან ენგურამდე ლიანდაგს ხავსისგან წმენდენ.
მარღანია ვარაუდობს, რომ ლიანდაგს ასუფთავებენ, რათა შემდეგ მისი აღდგენა მოხდეს. რკინიგზის ეს მონაკვეთი ამ დროისთვის დანგრეულია.
ტრანსპორტის სახელმწიფო სამმართველოს ხელმძღვანელის ზურაბ ხაჯიმბას ინფორმაციით, სარკინიგზო გზა მისი კაპიტალური რემონტისთვის მომზადების მიზნით იწმინდება, რათა აფხაზეთზე სატრანზიტო მატარებელი აღდგეს. მისი თქმით, აფხაზეთში ეს სამხედროები მოულოდნელად გამოჩნდნენ.
არაოფიციალური ინფორმაციით, რკინიგზის გასუფთავების სამუშაოებში რუსეთის ფედერაციის შეიარაღებული ძალების 800 სამხედრო მოსამსახურეა ჩართული.
