საქართველოს დემოგრაფიული საზოგადოება XXI-ის დირექტორი ზვიად ტომარაძე საქართველოს ეოვნული სიმბოლოების, გერბის, ჰიმნისა და სახელმწიფო დროშის შესახებ წერს. ტომარაძის განცხადებით ეროვნულ სიმბოლოებში არსებობს დეტალები, რომელიც აუცილებელია ჰერალდიკოსებისგან შემდგარმა კომისიამ შეისწავლოს, რადგან „ნაციონალური მოძრაობის" მმართველობის პირობებში მიღებული გადაწყვეტილებები ხშირ შემთხვევაში ნაუცბათევი და ზედაპირული იყო. სახელმწიფო დროშა, გერბი და ჰიმნი კი ამის ნათელი მაგალითია.
„სახელმწიფო გერბზე წმინდა გიორგი (უკუღმა) მარცხნივ არის შეტრიალებული და ურჩხულიც მარცხნივ არის გამოსახული, რომელსაც წმ. გიორგი მარჯვენა ხელით (უცნაურად) განგმირავს. ჰერალდიკოსების აზრით, სიმბოლოს, რომელიც სიკეთეს გამოსახავს, თუ საპირისპირო მხარეს შეატრიალებ, უკვე ბოროტების მნიშვნელობას იძენს...
ხუთჯვრიანი დროშა ვიზუალურად მომწონს, მაგრამ ძველი ქართული არ არის, ეს ჯვაროსნების დროშაა. ძველ ქართულ დროშას, ჯვრის სწორი ფორმები აქვს და წითელი ფერის მაგივრად - შინდისფერია.
ჰიმნის მელოდია მომწონს და ტექსტიც ადვილად სამღერია, მაგრამ აქაც ერთი მნიშვნელოვანი დეტალია. კერძოდ, რას ნიშნავს "ცისკრის ვარსკვლავი ამოდის?", როგორც ცნობილია ცისკრის ვარსკვლავი ლუციფერის და ვენერას სიმბოლოა.
ამ ყველაფრის გათვალისწინებით, აუცილებელია შეიქმნას სახელმწიფო კომისია, რომელშიც ჰერალდიკოსები იქნებიან წარმოდგენილი და ნაცმოძრაობის მიერ ნაუცბათევად მიღებული სახელმწიფო სიმბოლოების შესახებ იმსჯელებენ."- აღნიშნავს ტომარაძე.
