„თქვენი ჯილდო არავის სჭირდება, უბრალოდ სამართლიანი იყავით თუ ამის უნარი და შინაგანი სუფთა სული გაგაჩნიათ", - ჟურნალისტი ირაკლი შონია ამ სიტყვებით პრეზიდენტ გიორგი მარგველაშვილს მიმართავს. განცხადების ტექსტს გთავაზობთ:
„მინდა გიორგი მარგველაშვილს შევეხმიანო, რომელმაც სულ ცოტა ხნის წინ, თამარ მეფის ორდენით დააჯილდოვა სანდრო გირგვლიანის დედა. (საერთოდ დიდი ხანია საქართველოში ცოცხალ ადამიანს არ უფრთხილდებიან და როცა გარდაიცვლება ან კლავენ მერე დაიხოკავენ ღაწვებს და იწყება ბიუსტების დადგმა და ორდენების დარიგება), ნეტავ ეს გატანჯული ქალბატონი ცოცხალი ყოფილიყო და სამართალი ეპოვა, ეს უფრო სასურველი იქნებოდა ჩემთვის. მაგრამ კიდევ ერთელ დავრწმუნდი, რომ თქვენ ან უახლესი ისტორია არ იცით ან შეგნებულად აკეთებთ ამას და აგრძელებთ ანტიეროვნულ კურსს! შვილმკვდარ დედებს ნამდვილად ვერავითარი ჯილდო ვერ დააწყნარებს და ანუგეშებს.
ესებუების დედამ ორი ვაჟკაცი შესწირა ქვეყნას და რომელიმე მათგანი რესტორანში მომხდარ ჩხუბს კი არ ემსხვერპლა. არამედ საქართველოს თავისუფლების დაცვას შეეწირნენ!!! გია ესებუა 1991 წ 22 დეკემბერსვე დაიღუპა მთავრობის სასახლის წინ, როდესაც დედაქალაქში ჩამოვიდა ეროვნული ხელისუფლების და პრეზიდენტის დასაცავად. იმ ტყვიას, რომელიც გიას მოხვდა პუტჩისტების ხელით, მთელი ცხოვრება ინახავდა გოჩა, სრულიად საქართველომ იცის შევარდნაძემ როგორი სასიკვდილო განაჩენი გამოუტანა გოჩას და ზუგდიდის რაიონის სოფელ ონარიაში როგორ მოკლეს შევარდნაძის სადამსჯელო ბანდებმა. სულ ცოტა ხნის წინ ესებუების მამა მანქანის დაჯახების შედეგად გარდაიცვალა (ეგეც საკითხავია შემთხვევითობა იყო თუ არა)...
ესებუების დედას თქვენგან, გიორგი მარგველაშვილისგან არაფერი მოუთხოვია. რომელი ორდენი შეუმსუბუქებს დარდს და ვარამს, მაგრამ თქვენ რატომ არ აფასებთ საქართველოს ღირსეულ მამულიშვილებს? რომელი ერთი ვაჟკაცი გავიხსენო; განა მამუკა ცხადაია არაა დასაფასებელი? შესანიშნავი პოეტი და ნიჭიერი ახალგაზრდა, რომელიც ცაიშთან მოკლეს ხუნტის ჯალათებმა! არაფერი გსმენიათ გოჩა ჯიქიაზე? ზუგდიდის ცენტრში, ტყიბულის ბატალიონის წევრმა ვინმემ გიორგაძემ დედის თვალწინ რომ დახვრიტა?!!! რა დააშავეს მშვიდობიან მიტინგებზე უღვთოთ მოკლულმა ახალგაზრდებმა? მე პირადად როცა ვხვდები "დიდუბის" მეტროსთან მიტინგის დახვრეტის დროს მოკლულ გივიკო რეხვიაშვილის დედას ქ-ნ ჟანას ან 2 თებერვალს ცირკის მიმდებარე ტერიტორიაზე დახვრეტილ მამუკა ტერიშვილის დედას ქ-ნ მარინას მრცხვენია ყველას მაგივრად ,რომ არაფერი შემიძლია გარდა იმისა, რომ კალმით დავწერო და განვაცხადო. უბრალოდ სულ მახსოვს ეს ახალგაზრდები და არასოდეს დავივიწყებ. თქვენი ჯილდო არავის სჭირდება, უბრალოდ სამართლიანი იყავით თუ ამის უნარი და შინაგანი სუფთა სული გაგაჩნიათ!", - წერს ირაკლი შონია.
