თბილისში ე.წ. ღორის გრიპით 39 წლის მამაკაცი დაიღუპა. მამაკაცი დასავლეთ საქართველოდან ჩამოიყვანეს.

დაავადებათა კონტროლის და საზოგადოებრივი ჯანმრთელობის ეროვნული ცენტრის სამეცნიერო ხელმძღვანელის პაატა იმნაძის განცხადებით, თებერვალში ვირუსების მატების მეტი შემთხვევა იქნება.

„წინა კვირაში გარდაცვალების ერთი შემთხვევა იყო, პაციენტი დასავლეთ საქართველოდან იყო და თბილისში გადმოყვანის შემდეგ გარდაიცვალა, ავადობა არის 240 შემთხვევა, 100 ათას მოსახლეზე, მათ შორის იშვიათად, მაგრამ არის მძიმე შემთხვევები. თებერვალში ალბათ უფრო მეტი შემთხვევა იქნება მაგრამ ეპიდემიის ზღვარი არის 500 შემთხვევა 100 ათას მოსახლეზე და ამ ზღვარიდან ჯერჯერობით შორს ვართ," - განაცხადა პაატა იმნაძემ.

საზოგადოებრივი ჯანმრთელობის ეროვნული ცენტრის გადამდებ დაავადებათა დეპარტამენტში A (H1N1)  ვირუსის სიმპტომებზე და მათი თავიდან აცილების გზებზე საუბრობენ.

„სიმპტომები იწყება  მაღალი სიცხით და გამოხატული ინტოქსიკაციით, რაც ნიშნავს თავის ტკივილს, კუნთების და სახსრების ტკივილს, რომელსაც თან ახლავს ყელის ტკივილი და ხველა, ამ ყველაფრის თავიდან ასაცილებლად საჭიროა ჩატარდეს გრიპის საწინააღგმდეგო ვაქცინაცია და დაავადებულები უნდა დარჩნენ სახლში", - განაცხადა ხათუნა ზახაშვილმა.