თბილისის ზოოპარკის ადმინისტრაცია განცხადებას ავრცელებს და მოქალაქეებს მიმართავს:
„დღეს ჩიჩილაკებისა და ნაძვის ხეების დაშლა-არმოშლის დღეა, ამიტომ კიდევ ერთხელ გვინდა შეგახსენოთ ჩვენი მოკრძალებული სათხოვარი, რომელიც ჩიჩილაკებსა და ცოცხალ, მთლიან (არა ფიცრებითა და ტოტებით შეკრულ) ნაძვებს ეხება:
თუ საახალწლოდ ცოცხალი ნაძვის ხე (მთლიანი, არა ფიცრებისა და ტოტებისგან დამზადებული), ან ჩიჩილაკი გქონდათ, რომ დაშლით, პირდაპირ ნაგავში არ გადაუძახოთ. მათი გამოყენება შეიძლება ჩვენი ცხოველების გარემოს გასამდიდრებლად, კერძოდ სამალავების მოსაწყობად, ბარიერების შესაქმნელად, ყნოსვითი, კვებითი და სენსორული „ენრიჩმენტისთვის", ანუ ზოოპარკის ბინადრების ყოველდღიური ცხოვრების გასამრავალფეროვნებლად. ყოველივე ეს იმისთვისაა საჭირო, რომ ჩვენი ცხოველები უფრო მხიარულები და აქტიურები იყვნენ, არ მოიწყინონ და სხვადასხვაგვარი საინტერესო გასართობით გაიხალისონ ცხოვრება.
ძალიან გაგვიხარდება, თუ გადაგდების, ან დაწვის ნაცვლად ზოოპარკში მოგვიტანთ ნაძვებსა და ჩიჩილაკებს. ეს ნამდვილად სასარგებლო საქმე იქნება, რადგან გადასაგდებად განწირული საბრალო ნაძვები და ქოჩრიანი ჩიჩილაკები იმქვეყნად წასვლამდე კიდევ ერთ, მეტად საჭირო საქმეს გააკეთებენ - მათი გამოყენება მოხდება ცხოველების კეთილდღეობისთვის; თანაც, ჩვენი ქალაქიც ნაკლებად დანაგვიანდება.
ამ პოსტს რომ წაიკითხავთ წარმოიდგინეთ, როგორ გაუხარდებათ ჩვენს ლემურებს თქვენს ჩიჩილაკზე წამოცმული ვაშლების დანახვა. თქვენი საახალწლო ატრიბუტით ფაქტიურად მათაც მიულოცავთ ახალ წელს. ჰოდა გაავრცელეთ ეს თხოვნა, მოუყევით ახლობლებს, მეგობრებს, მეზობლებს... რაც მეტი ადამიანი გაიგებს, მით უკეთესი.
თქვენ ძალიან მარტივად, ყოველგვარი დანახარჯის გარეშე შეგიძლიათ ცხოველების დახმარება.
დაიწყეთ ახალი წელი კეთილი საქმით.
მადლობა, რომ გიყვართ ჩვენი ბინადრები და ზრუნავთ მათზე", - ნათქვამია ზოოპარკის ადმინისტრაციის განცხადებაში.
