პარლამენტის გარემოს დაცვისა და ბუნებრივი რესურსების კომიტეტის თავმჯდომარე გია ჟორჟოლიანმა ჟურნალისტებს განუცხადა, რომ აჭარაში, სოფელ ციხისძირიდან გიგანტური ხეების გადანერგვა გარემოს დაცვის მიმართულებით გადადგმული ნაბიჯია და მრავალწლიანი ხეების გადარჩენის მიზანს ემსახურება.
„რამდენადაც მაქვს ინფორმაცია, საქმე მრავალწლიანი ხეების გადარგვას ეხება, რაც უნიკალური პროექტია. ეს ძალიან ძვირადღირებული პროექტია და მსგავსი რამ ამერიკაშიც მოხდა. საქმეში დეტალურად ჩავიხედავ, მაგრამ ჩემს ხელთ არსებული ინფორმაციით, ეს ნაბიჯი გარემოს დაცვითი კუთხით არის გადადგმული, რათა მრავალწლიანი ხეები არ დაიღუპოს. ხეები ისეთ ადგილას გადააქვთ, რომელიც ეკოლოგიური თვალსაზრისით, მათი განვითარებისთვის და ადგილის გამწვანებისთვის საჭიროა", - განაცხადა გია ჟორჟოლიანმა.
მისივე თქმით, ხეების გადანერგვისთვის საჭირო თანხები „ქართუ ჯგუფმა" გამოყო. ამასთან, მისთვის უცნობია, მოხდება თუ არა ხეების გადატანა ბიძინა ივანიშვილის დენდროლოგიურ პარკში.
