ზვიად გამსახურდიას მთავრობის პრემიერ-მინისტრი ბესარიონ გუგუშვილი მიიჩნევს, რომ დამოუკიდებელი საქართველოს პირველი პრეზიდენტის, ზვიად გამსახურდიას გარდაცვალების გამოძიებისთვის შექმნილი კომისიები, დროში ძალიან გაწელილი გამოძიება და მოწმეთა თუ პრეზიდენტის გულშემატკივართა ვარაუდები ნელ-ნელა რეალობას სცილდება.
გუგუშვილის განმარტებით, „გამსახურდიას თვითმკვლელობის „მკვლელობად" მოქცევის პერიპეტიები სულ უფრო და უფრო გააფთრებულ, შლეგურ და ტრაგი-კომიკურ ხასიათს იძენს".
„პრეზიდენტ ზვიად გამსახურდიას თვითმკვლელობის „მკვლელობად" მოქცევის პერიპეტიები სულ უფრო და უფრო გააფთრებულ, შლეგურ და ტრაგი-კომიკურ ხასიათს რომ იძენს, ამას ქართველი საზოგადოებრიობის არსებითი ნაწილი შეგნებულად თუ შეუგნებლად უკვე ითავისებს, ან უმეტეს შემთხვევაში სავსებით უინტერესოდ და ინდეფერენტულად უყურებს...
ჩვენ, თანდათანობით მოგაწვდით ამ შიზოიდური შლეგობების ყველაზე ოდიოზურ გამოვლინებებს - რომელთაც არსებითი კონკურენციის გარეშე თაოსნობდა ჯერ „კოკოს საპარლამენტო კომისია" და ბოლოს ბოხი ბანის პრეტენზიით წარმოიჩიტა „თვით" პროკურატურაც.
კოკოს კომისიის გამორჩეული მითოსი გახლავთ ზვიად გამსახურდიასა და მისი თანმხლებების სავსებით რუტინული გადაადგილება სოფელ ჯიხაშკარიდან ძველ ხიბულაში - რაც მოწმეთა დროით გაბუნდოვანებული ჩვენებებით მანიპულირებებისა და ჟონგლიორობის ხარჯზე კოკომ და სხვა ვაი-გამომძიებლებმა ანეგდოტურ დონემდე „აამაღლეს".
რად ღირს თუნდაც „გამომძიებლების" გამუდმებული ზეწოლებით გაწამებული „ფასეული მოწმის" კარლო ღურწკაიას ჩვენებები - რომელიც იძულებული გახადეს თანდათანობით რაც შეიძლება მეტად მორგებოდა „მკვლელობისთვის" სასარგებლო დინებას...
თვალნათელი მაგალითისთვის წარმოგიდგენთ კარლო ღურწკაიას ჩვენებებს - 1999 წლის 5 თებერვლის, 2010 წლის 27 მაისისა და ბოლოს - 2015 წლის 11 მაისის ჩვენებებს...
როგორც მკითხველი თავადაც იოლად დარწმუნდება - კარლო ღურწკაია დროთა განმავლობაში ჩვენებებისას სტუმრების მოსვლის დროს სისტემატურად უფრო და უფრო გვიანისკენ გადასწევს (რათა ჯიხაშკარიდან ძველ ხიბულამდე გზაში დახარჯელი დრო „გამოძიების" შლეგურ მოთხოვნებს უკეთ შეუფარდოს) - რა მცდელობებითაც, საბოლოო ჯამში ამ „დროის გადაწევებმა" მთელი ორი საათი შეადგინა!
თავი დავანებოთ იმას, რომ კარლო ღურწკაია უკვე კაპიტალურადაა დაბნეული არა მხოლოდ სტუმრების მოსვლის დროში, არამედ - ვეღარ ერკვევა ფაქტის თარიღშიც კი. 2015 წელს მას უკვე თარიღის ზუსტი დასახელებაც აღარ შეუძლია - ვეღარ აზუსტებს, ეს ფაქტი 26 დეკემბერს მოხდა თუ 27 დეკემბერს!
ერთ - ერთ ძალიან „ჭკვიანურ" „ჟურნალისტურ გამოძიებაში" არა მხოლოდ კარლო ღურწკაიასთან გამსახურდიას ამალის მისვლის დრო და თარიღებია ფალსიფიცირებულ-აღრეული - აქ უკვე გენიალურად კიდევ ერთი დამატებითი ავტომანქანაც გამოიჩიკა! თურმე, ნუ იტყვით და ჯიხაშკარიდან ერთი „ვოლგით" გამოსული გამსახურდია და მისი ამალა ძველ ხიბულაში ორი ავტომანქანით ჩასულა!
სულაც არაა გამორიცხული, აღვირახსნილი შლეგობის მარულაში რაღაც დროის შემდეგ ორ ავტომანქანას ტანკი ან თუნდაც ბე-ტე-ერ-ი და „სპეცნაზის" ბატალიონიც წაემატოს..."- აღნიშნავს ბესარიონ გუგუშვილი.
