შრომის, ჯანმრთელობისა და სოციალური დაცვის მინისტრმა დავით სერგეენკომ დღეს გამართულ პრესკონფერენციაზე განაცხადა, რომ გრიპის ეპიდემიის არანაირი საშიშროება არ არსებობს.
„პირველ რიგში, ხაზი მინდა გავუსვა იმას, რომ გრიპის ეპიდემიის არანაირი საშიშროება არ არსებობს. შესაბამისად, არ არსებობს არანაირი საფუძველი იმისა, რომ მოსახლეობა არამცთუ პანიკაში იყოს, არამედ თუნდაც რაიმე დაძაბულობა იყოს. იმ ნაბიჯების მთავარი ამოცანა, რასაც ჩვენ ამ დღეების განმავლობაში ვახორციელებთ, არის ის, რომ როგორც დიდ ქალაქებში, ასევე რაიონებში სასწრაფო დახმარების სამსახურების გადატვირთული მუშაობა განიტვირთოს. მათ მიეცეთ იმის საშუალება, რომ თავისი მოვალეობა შეასრულონ - გადაუდებელი მდგომარეობების მართვა და მეორე მხრივ, მოსახლეობას შევუქმნათ კომფორტი, რომ გაზრდილი მიმართვიანობის შემთხვევაში, რაც ნამდვილად გვაქვს ამ დღეებში, მიიღონ კვალიფიციური დახმარება და ეს დახმარება მიიღონ იმ სპეციალიტებისგან, რომლებიც ამაში ყველაზე მეტად არიან მომზადებულები", - განაცხადა დავით სერგეენკომ.
სერგეენკოს თქმით, სამინისტროს მიერ გადადგმული ნაბიჯები არ არის მიმართული ეპიდემიის სამართავად, არამედ მიმართულია სასწრაფო დახმარების სამსახურების მუშაობის ნორმალიზაციისთვის.
