ლონდონის სასამართლოს დასკვნის მიხედვით, რუსეთის უშიშროების ფედერალური სამსახურის ყოფილი თანამშრომელის ალექსანდრ ლიტვინენკოს მკვლელობა, სავარაუდოდ, რუსეთის პრეზიდენტ ვლადიმირ პუტინის თანხმობით მოხდა. დოკუმენტის თანახმად, რუსეთის პრეზიდენტსა და მისი ადმინისტრაციის წევრებს ლიტვინენკოს მკვლელობის მოტივები გააჩნდათ:
„სავარაუდოდ, ლუგოვოიმ მოწამლა ლიტვინენკო რუსეთის უშიშროების ფედერალური სამსახურის მითითებით, პატრუშევისა და პუტინის თანხმობით", - ნათქვამია სასამართლოს მიერ გამოქვეყნებულ დასკვნაში.
დიდი ბრიტანეთის მოქალაქე ალექსანდრ ლიტვინენკო 2006 წელს პოლონიუმით მოწამვლის შედეგად გარდაიცვალა. ბრიტანელი გამომძიებლები მთავარ ეჭვმიტანილებად რუსული სპეცსამსახურების თანამშრომლებს ანდრეი ლუგოვოისა და დიმიტრი კოვტუნს მიიჩნევდნენ.
ლიტვინენკოს საქმის ერთ-ერთმა მთავარმა ფიგურანტმა, ანდრეი ლუგოვოიმ განაცხადა, რომ მის წინააღმდეგ გაჟღერებული ბრალდებები აბსურდულია.
ლონდონის სასამართლოს მიერ ლიტვინენკოს საქმესთან დაკავშირებით დასკვნის გამოქვეყნებას უკვე გამოეხმაურა რუსეთის საგარეო საქმეთა სამინისტრო. სერგეი ლავროვის უწყებაში აღნიშნავენ, რომ მოსკოვი ლიტვინენკოს საქმესთან დაკავშირებით ობიექტურ და მიუკერძოებელ დასკვნას არც ელოდა.
„ლონდონმა ლიტვინენკოს სიკვდილის წმინდა კრიმინალური საქმის პოლიტიზირება მოახდინა, რითაც რუსეთთან ორმხრივი ურთიერთობების საერთო ატმოსფეროს ჩრდილი მიაყენა", - ნათქვამია რუსეთის საგარეო საქმეთა სამინისტროს განცხადებაში.
