"პატრიოტთა ალიანსის" ლიდერი ირმა ინაშვილი გამოეხმაურა უკრაინული საიტების მიერ გავრცელებულ კადრებს, რომელზშიც ასახულია, როგორ იპოვეს ნარკოტიკული ზემოქმედების ქვეშ მყოფი მსახიობი მიშა მესხი და მისი მეგობარი კიევში, აეროპორტისკენ მიმავალ ტაქსში. მისი თქმით ამ ტიპის კადრების გავრცელება ყოვლად დაუშვებელია და უკრაინელმა რედაქტორებმა უხეშად დაარღვიეს ჟურნალისტიკის ფუნდამენტური სტანდარტი.
„ვხედავ: ნახევარი "ფეისბუქი" აღშფოთებულია მიშა მესხის საქციელის გამო. აღშფოთებულებს მოკრძალებით მინდა ვუთხრა: ამ ტიპის კადრების გავრცელება ყოვლად დაუშვებელია. უკრაინელმა რედაქტორებმა უხეშად დაარღვიეს ჟურნალისტიკის ფუნდამენტური სტანდარტი- ადამიანის პირადი ცხოვრება ხელშეუხებელია. ნარკომანია დაავადებაა და მესხის დაავადება მისი პირადი ცხოვრების ნაწილია.
არავინაა დაცული, რომ მისი შაქრის დიაბეტის, ან რაიმე სხვა დაავადების გამო, კომაში არ ჩავარდება... და ეს კადრები ვინმემ ტელევიზიით უნდა გაავრცელოს? მეორე- ჩვენი სახელმწიფოს ზრუნვის მთავარ მიმართულებად უნდა იქცეს ნარკომანთა მკურნალობა, რეაბილიტაცია.
იმ სატრანზიტო არხების კონტროლი, საიდანაც ქვეყანაში ნარკოტიკი შემოდის. თაობები კვდება... თაობები მოკლეს... ნიშნისმოგებით კი ნუ ვავრცელებთ ამ კადრებს, გულისტკივილმა გაგვაერთიანოს, რომ ნარკოტიკი საუკეთესო ახალგაზრდობას და ძველგაზრდობას გვართმევს. გამოსავალზე ვიფიქროთ. გამოსავალზე... მიშა მესხი უნიჭიერესი მსახიობია. როგორ გამოვტაცოთ სიკვდილს ეს ხალხი, ამაზე დავხარჯოთ ძალისხმევა... კრიტიკაზე და ლანძღვაზე კი არა.
ჩაიხედეთ საკუთარ გულებში: ნუთუ ყველა ასეთი იდეალურები ვართ?! კი, ბატონო, ნარკოტიკი არა, მაგრამ სხვა რამდენი ვნება გვაქვს დასაძლევი, ნარკოტიკზე უარესიცაა ზოგი", - ამბობს ინაშვილი.
წყარო: „მარშალპრესი"
