რეგიონული სასწრაფო დახმარების ეკიპაჟების სამედიცინო ინვენტარით აღჭურვა დაიწყო. პირველ ეტაპზე, შესაბამისი მოწყობილობები სამტრედიის რაიონულ სასწრაფო სამედიცინო დახმარების ცენტრს გადაეცა. აღჭურვის პროცესს სასწრაფო სამედიცინო დახმარების ცენტრის სამედიცინო ხარისხისა და გამოძახებათა მართვის დეპარტამენტის უფროსი ამირან გოგიტიძე და იმერეთის რეგიონის ვიცე-გუბერნატორი გიორგი ჭიღვარია დაესწრნენ.
სასწრაფო სამედიცინო დახმარების სამტრედიის რაიონის სამივე ეკიპაჟი კარდიოგრაფებით, დეფიბრილატორებით, სატრაქციო და ხერხემლის საიმობილიზაციო არტაშნებით, კისრის საყელოებით, მექანიკური მქაჩებით, სამედიცინო ჩანთებით, ჟანგბადის ბალონებით, საინტუბაციო კომბინირებული მილებითა და პორტატული პულსოქსიმეტრებით აღიჭურვა.
აღნიშნული სამედიცინო ინვენტარით იმერეთის სასწრაფო სამედიცინო დახმარების 40 ეკიპაჟი რამდენიმე დღეში აღიჭურვება. იმერეთის შემდეგ, ეს მოწყობილობები სასწრაფო დახმარების ეკიპაჟებს მთელი ქვეყნის მასშტაბით, ეტაპობრივად გადაეცემა.
