„რამდენიმე დღის წინ 20 მლნ დოლარი გამოიტანა ეროვნულმა ბანკმა გასაყიდად, ეს თანხა მთლიანად „საქართველოს ბანკმა" იყიდა და სად წაიღო, კაცმა არ იცის", - ამის შესახებ საპარლამენტო უმრავლესობის წევრი ომარ ნიშნიანიძე „ალიასთან" ინტერვიუში საუბრობს და აცხადებს, რომ აღნიშნული ინფორმაცია შესაბამის კომიტეტს უკვე მიაწოდა და მიმდინარეობს მოკვლევა.

„ლართან დაკავშირებით გული მისკდება. მაქვს ინფორმაცია, რომ რამდენიმე დღის წინ 20 მლნ დოლარი გამოიტანა ეროვნულმა ბანკმა გასაყიდად, ეს თანხა მთლიანად „საქართველოს ბანკმა" იყიდა და სად წაიღო, კაცმა არ იცის. ამიტომაც ლარის კურსზე საერთოდ არ იმოქმედა გამოტანილმა თანხამ. მე ყველა ჩავაყენე საქმის კურსში, მათ შორის, ჩემი კოლეგებიც. ვისაც გადამოწმებისა და შესწავლის საშუალება აქვს, ყველას მივაწოდე ინფორმაცია და მიდის შესწავლის პროცესი. იმედი მაქვს, ამ ყველაფერს სხვა დონეზე გადაამოწმებენ. ამას უკვე ჰქვია ანტისახელმწიფოებრივი საქმიანობა.

ეს საშინელებაა. მე ვიცი, ხალხი რა დღეშია. მინდა, „საქართველოს ბანკთან" დაკავშირებით პრემიერსაც ვუთხრა, ისიც უნდა ჩავაყენო საქმის კურსში", - განაცხადა ნიშნიანიძემ.

(მოამზადა ნენე სტეფანიშვილმა)

წყარო:   „ალია"