თბილისის ვიცე-მერმა ლაშა აბაშიძემ ტრანსპორტის საქალაქო სამსახურის საქმიანობის პრეზენტაციის დაწყებამდე დედაქალაქის მერიაში განაცხადა, რომ აგვისტოში დედაქალაქში ახალი ავტობუსები შემოვა.
მისი თქმით, 175 ახალ ავტობუსზე ტენდერი გამოცხადებული არის EBRD-ის საიტზე, პროექტი EBRD-ის თანადაფინანსებით ხორციელდება. ტენდერი 9 მარტს დასრულდება.
„აგვისტოში უკვე შემოვა სრულიად ახალი, თანამედროვე უსაფრთხო ახალი ტექნოლოგიებით დამზადებული ავტობუსები, ეს არის ძალიან სასიხარულო ინფორმაცია თბილისისთვის, რადგან ქალაქს ასეთი ავტობუსები ჯერ არ ჰქონია", - განაცხადა ლაშა აბაშიძემ.
მიმდინარე წელს დედაქალაქში შემოვა 175 ერთეული ახალი ავტობუსი. ხოლო მომდევნო წლებში ავტობაზის სრული შეცვლა იგეგმება.
ლაშა აბაშიძის განმარტებით, აშენდება ახალი ავტობაზა, რომელიც აღნიშნულ ავტობუსებს მოემსახურება.
