იუსტიციის უმაღლესი საბჭოს მდივანი ლევან მურუსიძე თბილისის საქალაქო სასამართლოს თავმჯდომარის მამუკა ახვლედიანის განცხადებას ეხმაურება. მურუსიძე ამბობს, რომ მოსამართლეთა საკვალიფიკაციო გამოცდების ტესტების წინასწარ გამჟღავნებისა და სხვა საკითხებზე იუსტიციის უმაღლესი საბჭო მოკვლევას აწარმოებს:

„დღევანდელ ე.წ. სკანდალურ განცხადებას რაც შეეხება, ამ თემაზე მოკვლევას საბჭო აწარმოებდა, მე თავად ვარ საქმის კურსში, უბრალოდ, არ მინდოდა, ეს ყველაფერი დროზე ადრე გამომჟღავნებულიყო. მაგრამ არის კიდევ სხვა თემები, გარდა გამოცდის თემებისა, რომელიც არის ძალიან საინტერესო, რა ხდება რეალურად სასამართლო კორპუსში, რაზეც მე ვმუშაობ. უბრალოდ, არ მინდოდა, ეს დროზე ადრე მომხდარიყო. მოკვლევის შედეგებს უნდა დაველოდოთ", - აცხადებს მურუსიძე.