ტელეკომპანია „მაესტროს" საკონტროლო პაკეტის მფლობელის გია გაჩეჩილაძის განცხადებით ტელეკომპანიის ერთ-ერთი მფლობელი კოტე გოგელია დიდი ხნის განავლობაში საკითხთან დაკავშირებით კომუნიკაციაზე არ გამოდიოდა, ხოლო მამუკა ღლონტის პოზიცია ამ დრომდე უცნობია.
„მაკა ასათიანი და კოტე გოგელია კომუნიკაციაზე არ მოდიოდნენ. ღლონტის პოზიცია როგორია, არ ვიცი. ბაია გადაბაძესთან კომუნიკაცია მქონდა და მიკვირს, ასეთ განცხადებებს რატომ აკეთებს. პატარკაციშვილების ოჯახს მაესტროში არანაირი ინტერესი არ აქვს. მათ უნდათ, რომ ამ ტელევიზიამ ძველი სახელი დაიბრუნოს. მაესტრომ, რომელიც მართალ სიტყვასთან ასოცირდებოდა, რეიტინგი დაკარგა. ამათ არ უნდათ, მაესტრო კარგი ტელევიზია იყოს, თორემ კარგ ჟურნალისტებს რომ უშვებ, რომლებსაც არხისთვის რეიტინგი და შემოსავალი მოაქვთ, ეს რატომ უნდა გააკეთო?!" - განაცხადა გია გაჩეჩილაძემ 2030-თან საუბარში და აღნიშნა, რომ აუცილებელია ტელეკომპანიაში აუდიტი შევიდეს.
„დოკუმენტების მიხედვით, მაესტროში თანხა მხოლოდ კოტე გოგელიას აქვს ჩადებული. არადა, გაჭირვების დროს მაესტროს დახმარებია ბადრი პატარკაციშვილის ოჯახი, ბიძინა ივანიშვილი, ჩვენ - მე და ჩემი ძმა და სხვები. ტელევიზიაში აუდიტით უნდა შევიდეთ და დავითვალოთ, ეს თანხები სად მიდიოდა. კოტე გოგელიას გარდა, მაესტროს ყველა დამფუძნებლისთვის გაუგებარი სიტუაციაა. დამფუძნებელთა კრება 5 წლის განმავლობაში არ ჩატარებულა." - აცხადებს გაჩეჩილაძე.
