მსახიობი იმედა კახიანი რელიგიური გრძნობების შეურაცხყოფის შესახებ კანონპროექტზე „რეპორტიორთან" საუბრისას აღნიშნავს, რომ აზრის გამოხატვის უფლება ყველას აქვს, კრიტიკა ნებისმიერ ადამიანს შეუძლია, თუმცა ზღვარგადასული კრიტიკა, შეურაცხყოფა დასჯადი უნდა იყოს.
„სხვა საკითხია, რელიგიური გრძნობების შეურაცხყოფაში ზუსტად რა იგულისხმება, თუმცა, კონკრეტულად, რომელიმე სასულიერო პირისა თუ ნებისმიერი რელიგიის შეურაცხყოფა, რა თქმა უნდა, დასჯადი უნდა იყოს. მე რომ ვინმემ შეურაცხყოფა მომაყენოს, ამაზეც უნდა აგოს პასუხი, ანუ რა მნიშვნელობა აქვს, ამ შემთხვევაში სასულიერო პირი იქნება თუ საერო, სამოქალაქო. თუ კონკრეტული შეურაცხყოფის ფაქტი დაფიქსირდება, ამაზე პასუხი უნდა მოეთხოვოთ. ამ შემთხვევაში კრიტიკას არ ვგულისხმობ, და არ ვამბობ, რომ საკუთარი აზრის გამოთქმის საშუალება ვინმეს უნდა აეკრძალოს, მაგრამ თუ ეს შეურაცხყოფაში გადადის, უკვე სხვა საკითხია. სამოქალაქო პირი რომ შეურაცხყო, ის არ უნდა დაისაჯოს? ასევე უნდა იყოს სასულიერო პირების შეურაცხყოფაზეც. ადამიანს შეუძლია აკრიტიკოს რამდენიც უნდა, კრიტიკას ვერავის აუკრძლავ, თუმცა ზომიერების ფარგლებში და იმ ზღვარს არ გადავიდეს, საიდანაც უკვე შეურაცხყოფა იწყება", - აღნიშნავს იმედა კახიანი.
