„პირადად მე, არავითარ მტკიცებულებას არ ვფლობ, რომ აღმოსავლეთ საქართველოში ბუნებრივი აირის უზარმაზარი მარაგია", - ამის შესახებ „რეპორტიორს" ენერგეტიკის ექსპერტმა დავით ელიაშვილმა განუცხადა. მისი თქმით, არათუ 4, ერთი ტრილიონი კუბური მეტრის ოდენობის მარაგიც რომ აღმოჩნდეს, საქართველოსთვის ეს იქნება ენერგოდამოუკიდებლობის გარანტი.

„ეს იქნება ღვთის საჩუქარი - საქართველო გაზის ძიებისგან გათავისუფლდება და დიდი შეღავათი იქნება ქვეყნისთვის.

20 წელია საუბრობენ, რომ აღმოსავლეთ საქართველოში ბუნებრივი აირის მარაგია, მაგრამ კომპეტენტური პირი, ვინც ამ საკითხთან უშუალო კავშირშია და იყო, არაფერს ამბობს. ამ საბადოს შესახებ მხოლოდ ჭორად გამიგია. ვფიქრობ, უნდა გააქტიურდნენ სპეციალისტები და სახელმწიფო. ენერგეტიკის სამინისტრო უნდა ჩაერთოს ამ საკითხში, თავი მოუყაროს სპეციალისტებს და დაადგინონ,  არის თუ არა რეალურად საქართველოში გაზის უზარმაზარი მარაგი", - განაცხადა ელიაშვილმა.

„აღმოსავლეთ საქართველოში გაზის უზარმაზარი მარაგი (3,8 ტრილიონი კუბური მეტრი) არსებობს", - აღნიშნული ინფორმაცია კომპანია „Frontera resource"-ზე დაყრდნობით ატლანტიკურმა საბჭომ საკუთარ ანგარიშში გამოაქვეყნა.