„მეუღლენი შეიძლება იყვნენ მხოლოდ ქალი და მამაკაცი", - ამის შესახებ „გაერთიანებული დემოკრატიული მოძრაობის" წევრი დიმიტრი ლორთქიფანიძე აცხადებს. როგორც ლორთქიფანიძემ „რეპორტიორის" პრესკლუბში გამართულ ბრიფინგზე განაცხადა, სამარცხვინოდ მიაჩნია, რომ საკანონმდებლო სივრცეში ვერ მოიძებნა 76 დეპუტატი, რომლებიც ხელს მოაწერდნენ კონსტიტუციაში შესატან ცვლილებას და დაადასტურებდნენ, რომ ოჯახი არის ქალისა და კაცის ერთობა.
„თავად ის ფაქტი, რომ ეს თემა ჩნდება დღეს ჩვენს სამართლებრივ, ზნეობრივ, იურიდიულ და მორალურ სივრცეში, არის ძალიან შეურაცხმყოფელი ქართველი საზოგადოებისთვის. საზოგადოება დაიღალა ამ თემებზე მსჯელობით. საზოგადოების ყოფა-ცხოვრების კანონზომიერება საუკუნეებია გაწერილია ქართულ დღის წესრიგშიც სამოქალაქო კოდექსშიც. დღეს რომ მეუღლეთა პერსონიფიცირება უნდა მოხდეს ქალად და მამაკაცად, ვფიქრობ, რომ ამაზე მსჯელობაც კი, უბრალოდ, დიდი შეურაცხყოფაა ქართველი საზოგადოებისთვის. მეუღლენი შეიძლება იყვნენ მხოლოდ ქალი და მამაკაცი.
მაგრამ, მეორე მხრივ, ამ თემის აქტუალობიდან გამომდინარე, ბუნებრივია, დაისმის კითხვა, თუკი კონსტიტუციაში ის ჩანაწერი არ გვაქვს, რაც მოგვეპოვება იერარქიით უფრო დაბალ საფეხურზე მყოფ კანონმდელობაში, რა უშლით ხელს ჩვენს კანონმდებლებს, რომ მოაწერონ ხელი იმ პეტიციას, რომელიც სანდრო ბრეგაძის მიერ იქნა წარდგენილი გუშინ პარლამენტში? ძალიან მარტივად დგას საკითხი, 76 დეპუტატი არ უნდა მოიძებნოს 5 წუთის განმავლობაში, რომ ძალიან ბუნებრივად გაეცეს კითხვებს პასუხი?!
ძალიან სამწუხაროდ და სამარცხვინოდ მიმაჩნია, რომ ვინაიდან 76 დეპუტატი ჯერ ვერ მოიძებნა საქართველოს პარლამენტის უმრავლესობაში, საკითხი უკვე ისე დადგა, რომ სარეფერენდუმო შეკითხვა გაეგზავნა გუშინ ცენტრალურ საარჩევნო კომისიას", - განაცხადალორთქიფანიძემ.
