საქართველოს ეროვნული უშიშროების საბჭოს მდივნის მოადგილე ივლიანე ხაინდრავა აშშ-ის დაზვერვის ეროვნული სამსახურის ყოველწლიურ ანგარიშში საქართველოში არსებული ვითარების შეფასებასთან დაკავშირებით კომენტარს აკეთებს.
„აშშ-ის დაზვერვის უფროსის პოზიცია მნიშვნელოვანი და დროულია. იგი მოუწოდებს დასავლეთის ლიდერებს, გაზარდონ ევროატლანტიკურ სტრუქტურებში საქართველოს ინტეგრაციის ტემპი, რათა საფუძველი გამოაცალონ რუსეთის მიზანმიმართულ მცდელობებს, შეაფერხოს NATO-სა და ევროკავშირთან საქართველოს დაახლოების პროცესი", - აცხადებს ხაინდრავა.
ამერიკის დაზვერვის სამსახურის ხელმძღვანელმა ჯეიმს კლეპერმა სენატში გამოსვლისას საქართველოს შესახებ ისაუბრა და წარმოადგინა ანგარიში მსოფლიო საფრთხეების შესახებ. ანგარიშში საუბარია საქართველოს დასავლური ორიენტაციის საფრთხეებზე.
„მიუხედავად იმისა, რომ საქართველო რეფორმების კუთხით წარმატებას აღწევს, ქართული პოლიტიკა პოლიტიკური კონკურენციის ზრდის ფონზე უდავოდ ცვალებადი იქნება.
ეკონომიკური ცვლილებები 2016 წლის არჩევნების წინ, მთავრობისთვის, სავარაუდოდ, მთავარი პოლიტიკური სისუსტე გახდება.
დასავლური ინტეგრაციის ნელი ტემპის გამო ქართულ ელიტასა და საზოგადოებას შორის მზარდი იმედგაცრუება და სულ უფრო მეტი ეფექტური რუსული პროპაგანდა ქმნის იმის პერსპექტივას, რომ თბილისმა უფრო მასშტაბური ევროატლანტიკური ინტეგრაციის მიმართულებით ძალისხმევა შესაძლოა შეასუსტოს ან შეაჩეროს.
რუსეთთან დაძაბულობა კვლავ მაღალ დონეზე დარჩება და ჩვენი შეფასებით, მოსკოვი ზეწოლას გაზრდის თბილისზე, რომ ევროკავშირსა და NATO-სთან ახლო ურთიერთობებზე უარი თქვას", - აღნიშნულია დოკუმენტში.
