ბიზნეს-ასოციაციამ დადებითად შეაფასა საგადასახადო კოდექსში შესატანი ცვლილებები. როგორც ასოციაციის წარმომადგენელმა ირაკლი ასლანიშვილმა განაცხადა, საგადასახადო კოდექსში შესატანი ცვლილებები დადებითად აისახება საქართველოს ეკონომიკაზე. ესტონური მოდელი თავის დროზე საკმაოდ წაადგა ესტონეთის ეკონომიკას და ასევე იქნება საქართველოს შემთხვევაშიც.
„ჩვენი დამოკიდებულება კოდექსში ცვლილებაზე არის აბსოლუტურად დადებითი. 2013 წლიდან პარტნიორ ორგანიზაციებთან, ამ ცვლილებების საჭიროებებზე ღიად ვსაუბრობდით. იანვარში, როდესაც პრემიერი შეხვდა ბიზნეს-ასოციაციის წარმომადგენლებს, გაჟღერებული იყო ეს ინიციატივა. მისასალმებელია, რომ ასე მოკლე დროში მთავრობის სხდომაზე გავიდა საგადასახადო კოდექსში შესატანი ცვლილებები. ცვლილებები გულისხმობს ესტონური მოდელის დანერგვას საგადასახადო ლიბერალიზაციის საკითხში. ჩვენი მხრიდან აბსოლუტური მხარდაჭერა აქვს ამ ინიციატივას. მისასალმებელია, რომ კონკრეტული ინიციატივებიდან კონკრეტულ პროექტებამდე მივდივართ. ესტონური მოდელი თავის დროზე საკმაოდ წაადგა ესტონეთის ეკონომიკას. ამ მოდელის დანეგვა საქართველოში, დარწმუნებული ვარ, დიდი სარგებლის მომტანი იქნება ქვეყნის ეკონომიკისთვის", - განაცხადა ირაკლი ასლანიშვილმა.
