ქარელის რაიონის სოფელ ღოღეთის მიმდებარე ტერიტორიაზე რუსი სამხედროები დღეს დილიდან გამოჩნდნენ. რამდენიმე დღის წინ საოკუპაციო ჯარის წარმომადგენლებმა ე.წ. სამხრეთ ოსეთის სახელმწიფო საზღვრის აღმნიშვნელი ტრაფარეტები დაამონტაჟეს და მავთულხლარეთების გავლება განაახლეს.
საფორთიფიკაციო ნაგებობებისთვის გათვალისწინებული ლითონის ბოძები რუსმა მესაზღვრეებმა აღნიშნულ ტერიტორიაზე უკვე მიიტანეს და ე.წ. საზღვრის გავლების სამუშაოებს შეუდგნენ.
მოსახლეობის ნაწილი აცხადებს, რომ ხორბლის ნათესები აღნიშნული მავთულხლართების გავლების შედეგად, ოსური მხარის კონტროლირებად ტერიტორიაზე მოექცევა.
სოფლის რწმუნებული თამაზ ბერუაშვილი აცხადებს, რომ ამ მავთულხლართების მონტაჟი სწორედ იმ ადგილზე მიმდინარეობს, სადაც რუსებმა ე.წ. საზღვრის აღმნიშვნელი ბანერები დაამონტაჟეს.
მან ასევე აღნიშნა, რომ ადგილობრივი მოსახლეობა გაფრთხილებულია, მაქსიმალურად შეიკავონ თავი აღნიშნულ ტერიტორიაზე გადაადგილებისგან, რადგან რუსი სამხედროების პროვოკაციას არ წამოეგონ.
