ეკონომიკისა და მდგრადი განვითარების მინისტრი ნათია თურნავა ქართულ კომპანია „არგოსა“ და ნიდენლანდურ „Royal Swinkels Family Brewers“-ს შორის ხელშეკრულების გაფორმებას დაესწრო, რომლითაც ნიდერლანდურმა კომპანიამ „არგოს“ წილის 40 პროცენტი შეისყიდა.

ეკონომიკის სამინისტროს პრესსამსახურის ინფორმაციით, კომპანიებს შორის თანამშრომლობა 2017 წელს დაიწყო, როდესაც „Royal Swinkels“-მა „არგოს“ ბრენდი „ჰოლანდიის“ წარმოების ლიცენზია გადასცა. ქართულ კომპანიაში წილის შესყიდვით, „Royal Swinkels“-მა საქართველოს ლუდის ბაზარზე თავისი წილი 15 პროცენტამდე გაზარდა.

ხელშეკრულების წილის შესყიდვის თაობაზე ხელი მოაწერეს კომპანია „არგოს“ გენერალურმა დირექტორმა ვასილ სულხანიშვილმა და „Royal Swinkels Family Brewers“-ის გენერალურმა დირექტორმა პიერ სვინკელმა.

უწყების ცნობით, ხელმოწერის შემდეგ მედიასთან საუბარში, „Royal Swinkels Family Brewers“ის გენერალურმა დირექტორმა პიერ სვინკელმა განაცხადა, რომ საქართველოს ლუდის ბაზარი დინამიურად იზრდება, რასაც ტურიზმის სფეროს განვითარება უწყობს ხელს.

„ასევე დიდი პოტენციალი გვაქვს ქვეყნის გარეთაც. საქართველოს მთავრობას გაფორმებული აქვს თავისუფალი ვაჭრობის შეთანხმებები არაერთ ქვეყანასთან, მათ შორის, ევროკავშირთან, ჩინეთთან და სხვა სახელმწიფოებთან, რაც ძალიან ხელსაყრელია ექსპორტისთვის. ეს საშუალებას აძლევს ჩვენს კომპანიას ამ შეთანხმებების ფარგლებში წარმატებით გავიდეს საექსპორტო ბაზრებზე. ასევე მინდა მადლობა გადაგიხადოთ თქვენ, როგორც ეკონომიკის მინისტრს, რადგან მთავრობასთან ერთად მუშაობთ ამ ქვეყანაში საუკეთესო საინვესტიციო გარემოს შესაქმნელად“, - განაცხადა პიერ სვინკელმა.