ბელარუსის პრეზიდენტი ალექსანდრ ლუკაშენკო მინსკში თავის მხარდამჭერ დემონსტრაციაზე მივიდა.

სამთავრობო მიტინგი ბელარუსის დედაქალაქში დამოუკიდებლობის მოედანზე, მთავრობის სახლთან იმართება.

„მე აქ დაგიძახეთ არა ჩემს დასაცავად, თუმცა, ამის გარეშეც არ არის. თქვენ აქ ჩამოხვედით, რომ პირველად, საუკუნის მეოთხედის განმავლობაში შევძლოთ საკუთარი ქვეყნის, დამოუკიდებლობის, ცოლების, დებისა და შვილების დაცვა“, – მიმართა ალექსანდრ ლუკაშენკომ შეკრებილებს და აღნიშნა, რომ ის მოედნებისა და მიტინგების მომხრე არ არის და მისი ბრალი არაა, რომ მოქალაქეებს დემონსტრაციაზე დაუძახა.

მან თავის მოწინააღმდეგეებს მიმართა – „გსურთ რეფორმები? ხვალვე დავიწყებთ“.

„არჩევნები შედგა. არ შეიძლება, 80%-ზე მეტი იყოს ფალსიფიცირებული“, – განაცხადა ლუკაშენკომ.

მისი თქმით, განმეორებითი არჩევნების ჩატარება ქვეყანას დაღუპავს.

„წავალთ არჩევნებზე – დავიღუპებით და სწორედ ეს სურთ იქ, საზღვარგარეთ. ვის სურს ახალი არჩევნები, ფანჯრიდან გაიხედეთ! NATO-ს ჯარი დგას ჩვენს საზღვრებთან. ლიეტუვა, ლატვია, პოლონეთი, უკრაინა ჩვენ ახალი არჩევნების ჩატარებას გვიბრძანებენ​. თუ მათ ნებას გავყვებით, ვერასდროს დავასტაბილურებთ ჩვენს ხომალდს. ჩვენ არ გვჭირდება საზღვარგარეთული მთავრობები, ჩვენ საკუთარი გვჭირდება. ჩვენ ახალ ხელისუფლებას გვთავაზობენ, გვთავაზობენ NATO-ს ჯარისკაცებს, შავკანიანებს, ყვითელპირებს და ქერებს. კი, ჩვენ მკაცრი კურსი გავაგრძელეთ. დიახ, ვიღაცას ჩემი პოლიტიკა არ მოსწონდა, თუმცა, 90-იანი წლებში დავამტკიცეთ ეს ხელისუფლება, მაში, როდესაც ახალი კონსტიტუცია მივიღეთ. თქვენ მაშინ წესრიგის დამყარებას ითხოვდით – მე ის დავამყარე! თქვენ ითხოვდით, კორუფციისა და ოლიგარქების გარეშე. სად არიან ეს ოლიგარქები? თქვენ ითხოვდით მინსკის ქუჩების ბანდიტებისგან გაწმენდას. მე ეს გავაკეთე“, – მიმართა ლუკაშენკომ შეკრებილებს.

ბელარუსის პრეზიდენტის თქმით, ბელარუსს არ ჰყავს მომხრეები და მეგობრები, რადგან „ყველას სურს, რომ დაგვაჩოქოს“.

ალექსანდრ ლუკაშენკოს განცხადებით, მან საუკუნის მეოთხედი, თავისი ახალგაზრდობა და საუკეთესო წლები ქვეყნისა და ხალხის სამსახურს შეალია.

„ისინი მიყვირიან, წადი. მე აქ იმიტომ არ ვარ, რომ ხელისუფლებას გამოვეკიდე. დაღუპავთ არა ლუკაშენკოს, დაღუპავთ პირველ პრეზიდენტს – ეს იქნება თქვენი დასასრულის დასაწყისი. თქვენ როგორც უკრაინაში და სხვა ქვეყნებში, მუხლებზე იდგებით და კაცმა არ იცის, ვისზე ილოცებთ. გაუფრთხილდით ბელარუსს, რადგან ის უკვე არა ჩვენ, არამედ ჩვენს შვილებსა და შვილიშვილებს ეკუთვნის. ეს ძალიან სერიოზული პერიოდია, სწორედ ამიტომ დაგიძახეთ დღეს აქ, რომ მხარი დაუჭიროთ თქვენს ქვეყანას“, – განაცხადა ლუკაშენკომ.

ბელარუსის პრეზიდენტის სიტყვით გამოსვლისას მისი მხარდამჭერები სკანდირებდნენ „მადლობას“.

ამასთან, ლუკაშენკოს გამოსვლის პარალელურად, მინსკში ანტისამთავრობო მსვლელობა განახლდა.

აღსანიშნავია, რომ მიტინგზე მისვლამდე ალექსანდრ ლუკაშენკო ტელეფონით რუსეთის პრეზიდენტს ვლადიმირ პუტინს ესაუბრა.

წყარო :