„ქართული ოცნების“ წევრი, რატი იონათამიშვილი Facebook-ის საკუთარ გვერდზე და ISFED-ის პარალელური დათვლის დაზუსტებული შედეგების გამოქვეყნებას ეხმაურება.

„დღეს, ერთ მხარეს იყო ISFED-ის პარალელური დათვლის დაზუსტებული შედეგები, რომელმაც დაუსვა წერტილი დისკუსიას არჩევნების გაყალბებაზე და დიპლომატიური კორპუსის წარმომადგენლობა მე-10 მოწვევის პარლამენტის გახსნაზე, რომელმაც დაასრულა საუბრები პარლამენტის ლეგიტიმურობაზე, ასევე, დასავლელი პარტნიორების შეფასებები, რომ ვინც უარს ამბობს მოლაპარაკებაზე, ის ცდილობს ხელი შეუშალოს საქართველოს ინტეგრაციას ევროპულ და ევროატლანტიკურ სტრუქტურებში; და მეორე მხარეს - უპასუხისმგებლო და, მათ შორის, უმანდატო ოპოზიციის ხელმოწერა გაურკვეველ პლაკატებზე... და ისევ მოწოდება ბოიკოტსა და დესტრუქციაზე“ - წერს რატი იონათამიშვილი.

ცნობისთვის, არასამთავრობო ორგანიზაციამ „სამართლიანი არჩევნები“ საპარლამენტო არჩევნების შედეგების პარალელური დათვლის დაზუსტებული შედეგები გაავრცელა. როგორც ორგანიზაციაში აცხადებენ, დადგენილი სხვაობა გავლენას არ ახდენს არც ერთი საარჩევნო სუბიექტის მანდატების რაოდენობაზე.