საქართველოს პრეზიდენტის სალომე ზურაბიშვილის განცხადებით, დღეს ჩვენ თუ ვართ ძალიან ახლოს NATO-ს ღია კართან, ვიცით, რომ გაწევრიანებას შეიძლება რაღაც დრო დასჭირდეს. ამის შესახებ საქართველოს პრეზიდენტმა სალომე ზურაბიშვილმა NATO-ს გენერალური მდივნის სპეციალურ წარმომადგენელ სამხრეთ კავკასიასა და ცენტრალურ აზიაში, ჯეიმს აპატურაისთან შეხვედრის შემდეგ გამართულ ერთობლივ ბრიფინგზე განაცხადა.
მან საქართველოსა და NATO-ს ურთიერთობების განმტკიცებაზე ისაუბრა და ჯეიმს აპატურაის გაწეული სამსახურისთვის მადლობა გადაუხადა.
„დღეს ჩვენ თუ ვართ ძალიან ახლოს ღია კართან, ვიცით, რომ ამას შეიძლება რაღაც დრო დასჭირდეს, ეს არის პრაქტიკულად იმ ოჯახში ყოფნა, რადგან კარები კარებია, გაწევრიანება - გაწევრიანება, მთავარია, ჩვენი ყოველდღიური თანამშრომლობა ძალიან კონკრეტული იყოს. ძალიან ბევრი დარგია, სადაც ვთანამშრომლობთ და რომელიც გვაძლევს იმ გაზრდილ უსაფრთხოების განცდას, რაც არის აუცილებელი ჩვენი ქვეყნისა და ეკონომიკური განვითარებისთვის. ეს ძალიან სერიოზულ როლს თამაშობს. ჩვენ დღეს იმისთვის ვართ აქ, რომ მადლობა გითხრათ მეგობრობისთვის, მაგრამ ასევე გთხოვთ და ვიცი, რომ ამ თხოვნაზე პასუხი იქნება დადებითი, გთხოვთ, დარჩეთ ჩვენი მეგობარი იმ ახალ ფუნქციაში, ახალ თანამდებობაზე, რომელიც არანაკლებ მნიშვნელოვანი იქნება ჩვენი ქვეყნისთვის და ჩვენი NATO-სთან ურთიერთობაში. თქვენ ახლა ჩაიბარებთ ძალიან მნიშვნელოვან პასუხისმგებლობას ჰიბრიდული ომისა და კიბერუსაფრთხოების საკითხებში, რომელიც ჩვენთვის, ისევე როგორც NATO-ს ყველა წევრისთვის ახალ გამოწვევას წარმოადგენს. პრინციპში, ამ გამოწვევის წინაშე ყველა ერთი ვართ. ძნელია, ამ გამოწვევის წინაშე წევრი და არაწევრი ქვეყანა განასხვავო. ვიცით, რომ ამ გამოწვევას ყველა ერთად და ძლიერად უნდა დავხვდეთ“,- განაცხადა ზურაბიშვილმა.