ლა-მანშის სრუტეში მიგრანტების ნავის ჩაძირვის შედეგად, 20-ზე მეტი ადამიანი დაიღუპა. ინფორმაციას ამის შესახებ საფრანგეთის პოლიცია ავრცელებს.

საფრანგეთის შინაგან საქმეთა სამინისტროში განაცხადეს, რომ საფრანგეთის საპატრულო გემებმა ცხედრები და უგონო მდგომარეობაში მყოფი ადამიანები აღმოაჩინეს.

სამძებრო სამუშაოებში მონაწილეობის მისაღებად სამი ვერტმფრენი და სამი კატარღაა მობილიზებული.

„ლა-მანშის სრუტეში მომხდარი კატასტროფა ტრაგედიაა. ჩემი ფიქრებით უგზო-უკვლოდ დაკარგულ ადამიანებთან და დაშავებულებთან ვარ, რომლებიც კონტრაბანდისტების მსხვერპლნი არიან“, - განაცხადა საფრანგეთის პრემიერ-მინისტრმა.

საფრანგეთის ხელისუფლების ინფორმაციით, მიმდინარე წლის დასაწყისიდან საფრანგეთიდან დიდ ბრიტანეთში გამგზავრება 31 500-მა ადამიანმა სცადა, ხოლო ზღვაში კი 7 800 ადამიანი გადაარჩინეს.