ექსპერტ რამაზ საყვარელიძის განცხადებით, რევოლუციური სცენარის ერთ-ერთი ძირითადი საყრდენი საზოგადოებაა და ხალხი, ისევე როგორც „თავისუფალი ზონის" წევრები, არ უნდა აჰყვნეს ამ სცენარს.

მისი თქმით, დესტაბილიზაციის მცდელობაც კი, უარყოფითია არამარტო ქართული ინტერესებიდან გამომდინარე, არამედ საერთაშორისო პარტნიორებისთვისაც.

„მოგეხსენებათ კელის განცხადება, რომ მისთვის ის სტაბილურობა, რითაც ახლა მიდის პროცესი, მოსაწონი იყო. ეს ფაქტიურად, იყო მითითება, რომ დესტაბილიზაცია მიუღებელია.

„ნაციონალური მოძრაობა" ხელისუფლებაში მოვიდა რევოლუციის გზით, წარმატებას ამ გზით მიაღწია. ახლა, გაჭირვება აქვს და არ არის გამორიცხული, იმავე მეთოდს მიმართოს, რასაც 2003-ში. რევოლუციური გზა ამ პარტიის ისტორიაში დევს, ამიტომ, გასაკვირი არაა მათგან.

საზოგადოება მზად უნდა იყოს, რომ ჩაბმა ამ პროცესში და ცდუნება ბევრნაირი იქნება. ხალხმა უნდა გაითავისოს, რომ ეს ქვეყნისთვის ცუდი იქნება. ერთ-ერთი ძირითადი საყრდენი რევოლუციური სცენარისა, არის საზოგადოება, ხალხი არ უნდა აჰყვეს ამ სცენარს, ისევე როგორც „თავისუფალი ზონის" წევრები", - განაცხადა საყვარელიძემ.

„თავისუფალი ზონის" გლდანის რაიონული განყოფილების წევრები ორგანიზაციას ტოვებენ და აცხადებენ, რომ საქართველოს ყოფილ პრეზიდენტს არჩევნების შემდეგ, ისინი ორგანიზაცია დესტაბილიზაციის მოსაწყობად სჭირდებოდა.

მათი განცხადებით, საქართველოში შეიქმნა ორგანიზაცია - „საქართველოს ერთგულების სახელით", რომელსაც უშუალოდ აქვს დავალებული არჩევნების შემდეგ, ხალხის ქუჩაში გაყვანა და დესტაბილიზავიის მოწყობა.